International School Leadership

April 26, 2016

Mas o menos 80 participante a participa na e di 3 modulo di e programa di Internacional School Leadership, den cual ta enfoca specialmente riba e cabesantenan di scol of top funcionarionan den enseñansa.

Mayornan por ta hopi orguyoso di kico tur ta sosodiendo den scolnan

E participantenan aki awor a termina no menos di 6 luna di curso intensivo y di cual e ultimo siman tabata masha pisa mes, pasobra a presenta algun plan caba di con e scolnan tin pensa di haci cambio pa mehora resultado di nan scol.

Tabatin representacion di scolnan grandi, mediano y chikito, mescos tambe di scolnan primario, basico, secundario, avansa y asina por sigui menciona.

“Mi ta masha contento y satisfecho cu e progreso cu nos ta nota den e participantenan”, asina Lora Summerville, instructor di e programa di International School Leadership di e Ontario Principal Council, a enfatisa na final di e siman di curso.

E curso tabata masha inspirativo pa e participantenan y awor ta scuchando mas y mas con e cabesantenan ta papia di cambia nan sistema di duna les, mas sosten pa e docentenan, sosten pa otro den e comunidad di docentenan di scol y asina por sigui menciona progreso enorme den e actitud y pensamento cu si nos traha uni como un ekipo, cu sigur nos ta logra mas.

E instructor Canades a bisa na final cu ainda tin mas trabou pa realisa. Despues di tabatin 80 lider den enseñansa den un sala hunto siguiendo curso, e siguiente paso awor ta pa yuda mayornan y comunidad completo compronde e trabou increibel cu ta sosodiendo na scolnan di Aruba. Mester cuminsa haci pregunta y ricibi contesta riba con scolnan ta progresando, specialmente den miho resultadonan.

Den e curso tabatin representacion di Departamento di Enseñansa, di directivanan di scol, cabesante y docentenan di scol. Pues, tur esunnan cu ta den un posicion di tuma decision y haci cambionan necesario den enseñansa. Tur tabata hunto den e curso y tur awor ta riba e mesun nivel di pensamento di kico tur nos mester haci pa den un forma coordina y demostrando liderazgo, nos hiba nos enseñansa na e siguiente nivel di crecemento y desaroyo.

E instrumentonan pa mehora enseñansa ta den nos man

Tabata un programa di certificacion international cu a cuminsa for di aña pasa, ta masha intensivo mes, den tres diferente componente, pero cu ta yegando su final. E participantenan mester a presenta un plan di mehoracion den nan scol. “Tabata un atardi fantastico pa sinta scucha ideanan nobo cu a sali . E participantenan a demostra cu nan sa y ta capaz pa realisa e cambionan”, asina Minister di Enseñansa Michelle Hooyboer-Winklaar a duna di conoce.

Mester menciona cu tin tres diferente grupo participando den e curso y tur tres tabata hunto diabierna ultimo pa scucha di e plannan presenta. Pa esunnan cu ta den nan ultimo fase tabata un momento pa demostra kico tur nan a siña, mientras cu pa e participantenan cu apenas a cuminsa of ta na mita den e curso, pa nan e tabata un bon oportunidad pa realisa kico tur ta spera nan ainda durante e trayecto di modulonan pa logra finalisa e International School Leadership Program.

“E comentarionan cu mi a ricibi ta fantastico, hopi positivo. Mayoria participante a bisa cu hopi di e informacion nan kizas a yega di scucha caba, pero awor a trece den un angulo diferente, yena cu ideanan nobo y sugerencianan con pa logra miho resultadonan”, asina e mandatario a conta.

E programa riba su mes ta un herment ideal pa inspira cabesantenan di scol, con pa lidera un scol, cu no ta solamente e edificio, sino atende cu docentenan, alumnonan, mayornan y asina por sigui menciona. Na final di e curso, pa e Minister di Enseñansa ta masha importante pa participantenan sinti nan mes den un spotlight, den un ambiente cu ta permiti nan pa pensa un tiki “outside the box” y pa nan sa di e “best practice” cu ta wordo haci na otro parti di mundo cu nos por adopta pa nos isla.

“Mi ta convenci cu e cabesantenan sa di e aspectonan cu nos kier cambia y kico ta e instrumentonan cu nos tin pa haci’e posibel”, segun Minister Hooyboer-Winklaar, cu ta sigur di su mes cu e curso ta masha exitoso. “Minimal, e hecho cu nos ta trece cabesantenan hunto, cu hopi biaha no ta topa otro, cu esaki tabata un momento masha oportuno pa nan topa y comparti y intercambia di informacion valioso riba desaroyo di nan scol”.

Cabesantenan satisfecho cu e progama di certificacion

Tabata un siman intensivo cu cursonan rico na contenido brindando mas informacion y practica, strategianan y formulanan con pa sigui hiba educacion pa dilanti. E ser humano tabata central y di mas balor, en bes di material so, pues enfocando riba e factor hende y combin’e den e forma con ta duna les.

“Nos mester haci e impacto den bida di e studiante, sin distingui na ki nivel e ta, pero cu den dje nos por crea un lider cu el a nace pa ta”, asina Vanessa Croes, cabesante di Imelda Kleuterschool a bisa na final di e curso special di “International School Leadership”.

Despues di a termina e di tres modulo di ISL, e cabesantenan tur ta mira atras na un exito rotundo. No ta normal cu ta kita 1 siman di trabou, pa por sigui un curso, pero e tabata bale la pena. “Lead by example” tabata un di e temanan cu a elabora hopi riba dje durante e siman di curso, den cual ta conseha e cabesantenan pa no solamente bisa locual mester haci pero tambe pa haci locual ta bisa.

“Esey pa mi tabata un cambio grandi den e forma di mira cosnan, pa e team cu ta traha cu nos tambe por sinti nan mes mas habri pa por sigui padilanti”, di acuerdo cu Franklin Richardson, cabesante di Fatima College na Dakota.

“E tabata un curso hopi dirigi riba e lider mes, riba Bo potencianan, riba Bo emocionnan, con Bo por ta un bon lider, con bo ta logra lo miho na bo Bo scol y pa Bo muchanan”, asina Sheila Lazo-Tromp, cabesante di Pius X School a splica. E ta kere cu e curso a siña e cabesantenan cu como lider semper mester ta on top, semper mester ta sigur di bo mes, emocionalmente mester ta stabiel, mester traha hopi relacionnan, riba e confiansa den bo team y sigur esaki ta bay bek den e scol, pa hunto carga e scol y hiba e studiantenan padilanti.

Cu e ceramento di e di 3 modulo di e curso di International School Leadership, awor e cabesantenan ta prepara pa na luna di october cuminsa cu e di 4 modelo mientras cu e ora lo start cu e ultimo grupo cu lo inicia e proceso cu entretanto ta den su di 3 rond caba. Por nota cu e cabesantenan y ehecutivonan den enseñansa ta masha contento cu e curso y di e contenido cu nan ta siñando. Claro cu e cambio di pensamento y forma di lidera un scol lo mester traduci su mes den miho resultadonan den nos enseñansa.

Cabesantenan di scol inspira door di programa di certificacion ISL: Liderazgo den enseñansa enfocando riba studiante y docente

Desde luna di october 2015 a inicia e programa di certificacion rond di e International School Leadership Program (ISL), di cual un cantidad di cabesantenan y ehecutivonan den enseñansa ta participa.

Roelien Hofman, cabesante di Prinses Amalia Basisschool ta corda ainda cu apenas el a haya e funcion di cabesante, cu e curso a start, pues net na bon momento. “Den e prome curso mi ta corda cu tabatin hopi begrippennan nobo, hopi ideanan nobo, nos a comunica hopi cu cabesantenan di otro nivel di scol. E di dos parti di e curso tabata mas practico, nos mester a traha diferente plannan chikito y na final mester a prepara un plan di mehoracion pa nos scol”, asina Juffrouw Hoffman a conta. E ta convenci cu tur lider den enseñansa mester haya e curso aki. Mas ainda e cabesante tabata masha contento di tende e anuncio di Minister Hooyboer-Winklaar cu lo tin posibilidad pa sigui cune. “Nos a siña hopi caba pero mi ta considera cu nos ta na un comienso ainda, awo nos tin cu traha riba uitvoering di e plan. Mi ta kere cu lo ta hopi bon pa nos haya sosten pa esaki. Pero tambe nos mester siña mas ainda pa ta un bon lider den enseñansa y den scol”, Rolien Hoffman a duna di conoce.

Marc Thiel, director adhunto na SPO Savaneta a bisa despues di a termina su curso cu e tabata masha intensivo pero masha fructifero. E ta bisa esaki pasobra ta considera pa tin tur hende den e mesun sala pa comparti diferente experencia for di kleuterschool te bovenbouw y sin lubida e contenido di e curso mes, den cual ta haya hopi herment pa traha cune na scol, sin duda a surpasa tur expectativa.

Dayenne Croes, cabesante di Colegio San Jose na Santa Cruz a splica cu a caba cu 6 modulo, den cual a haya hopi informacion pero tambe hopi ‘eye openers’ cu hopi biaha ta pasa riba cosnan cu ta lubida cu ta importante. A elabora hopi riba miho resultado pa e studiantenan, pero tambe riba e ekipo di docentenan. Siendo un curso di liderazgo a enfoca hopi riba con cabesantenan por trata mas cu su ekipo di docentenan, motiva nan mas, pa e scol por bay miho. E cabesante ta contento cu e curso pasobra e ta considera cu enseñansa ta cambia asina hopi cu aña,  pues tur curso pa mehoracion ta bon bini.

Hubert Goedgedrag, Rector na Colegio San Nicolas a bisa di ta masha contento di por ta un di e prome nan pa participa den e curso aki. “Ta un curso cu nos ta haya danki na Minister di enseñansa, di dos dama di edad di Canada pero cu masha energia. E curso tabata masha intensivo, pero tabata un eye opener pa nos tur. Mi a gusta cu nos a haya curso den un setting di cabesantenan di tur nivel”, asina e Rector a conta. E ta considera cu ta logrando e meta di curso, esta pa enfoca riba bienestar y progreso di e studiantenan, cu den futuro lo ta e lidernan cu lo dirigi nos pais.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw