“International Baccalaureate”
Un sesion di informacion pa docente, directivanan di scol y Departamento di Enseñansa a resulta den hopi entusiasmo pa “International Baccalaureate” na Aruba.
E programanan ofreci pa “International Baccalaureate” (IB) no ta manera e sistema cu ya nos conoce, como cu nan ta ofrece e programa rigoroso aki mundialmente unda cu tin diferente sistema di enseñansa cu ta wordo aplica, asina Juliette Chiew a comenta.
E coordinador di e departamento di “Quality assurance” na Universidad di Aruba, despues di atende e sesion di informacion ofreci siman pasa na educadornan y directivanan di scol, a splica cu IB ta ofrece enseñansa pa diferente grupo di edad, esta di 3 pa 12 aña, di 13 pa 16 aña, di 16 pa 19 aña y e ta curioso pa mira con e sistema lo desaroya su mes na Aruba. E nivel di IB ta bastante halto, el a agrega y si tin scolnan cu ta interesa pa adopta, introduci y ofrece IB aki e lo ta un desaroyo hopi interesante pa nos isla.
 |
Claire Romney, kende ta un conrector na Colegio San Nicolas tin experiencia personal cu IB como mayor y tabata pa prome biaha cu el a haya un impresion extenso di e programa for di e perspectiva di e educador. Su yiu muhe a haci su IB na Canada algun aña pasa y Romney a haya e presentacion ofreci pa Michael Leshner di IB fantastico, como cu asina el a amplia su conocemento y comprondemento di e programa. Romney ta agrega cu e ta compronde tambe kico e mandatario encarga cu enseñansa kier yega na dje pa e educadonan y scolnan nan Aruba y e ta aplaudi e iniciativa di kier ofrece mas opcionnan pa e muchanan pa nan yega na nan enseñansa. “Mi ta bay haci loke mi por pa logra esaki” Claire Romney a conclui bisando.
 |
Presente durante di e sesion di informacion tabata tambe representantenan di Departamento di Enseñansa. Regine Croes, ta lidera e programa di Proyecto Scol Multilingual (PSML) na e departamento aki, y a comenta cu pa basta tempo tabata buscando pa ofrece un otro opcion na muchanan cu ta bay scol na Aruba. Tabata hopi interesante pa ricibi tur e informacion, Croes a expresa. Na Aruba tin e sistema tradicional di enseñansa, cu tambe ta pasa den diferente fase di innovacion y banda di e sistema di Hulanda lo ta bon pa ofrece otro maneranan pa nos muchanan por logra exito den bida, el a agrega.
IB ta un alternativa cu ta cuadra cu e vision den enseñansa pa crea muchanan kende unda cu nan bay den mundo nan por funciona bon, y na por contribui cu e pais cu nan ta biba y nan comunidad. Den e muchanan aki ta cultiva habilidad nan di pensa critico; e programa ta crea tambe ciudadanonan cu ta haci obranan social y nan sa con pa maneha conflicto, Regine Croes a bisa. Croes a finalisa bisando cu IB sigur ta un opcion pa sigui explora mas leu.
 |
 |
Info | Contact
Pa mas informacion por busca den e alfabet menu riba homepage: [U]niversity of Aruba] of por tuma contacto cu: University of Aruba.
Scroll To Top
