Guia Comunitario ORG.aw

July 12, 2016

Mescos cu hopi pais rond mundo, pronto Aruba tambe lo conoce su propio “Guia Comunitario”, un sistema online na unda por busca informacion tocante organisacionnan y servicionan brinda na nos comunidad, incluso di nos scolnan na Aruba. E Guia Comunitario ta un plataforma online cu ta yama ORG.aw, cual ta referi na e palabra ‘organisacion’.

ORG.aw ta un iniciativa di CEDE Aruba hunto cu varios colaborador, mirando cu na e momento aki e no ta facil pa haya bista ariba tur organisacion y servicio comunitario na Aruba, aunke cu semper tin un necesidad pa esaki. Durante e ultimo 20 aña varios iniciativanan a wordo tuma pa documenta nos organisacionnan social. Tin diferente documento cu ta ofrece listanan di organisacion pa diferente grupo di meta den nos comunidad. Lamentablemente hopi biaha dato, adres, number di telefon, persona di contacto ta cambia y asina e documentonan no ta cuadra mas cu e realidad.

Mirando e necesidad pa un guia online cu semper ta “up to date” CEDE Aruba a habri un dialogo cu diferente organisacion, manera Departamento di Asunto Social, Departamento di Enseñansa, Departamento di Cultura, IBISA, Aruba Sport Unie, MOBIS, Fundacion pa nos Muchanan, Fundacion Respetami, Bureau Traimerdia, Asociacion Trabao pa Hubentud y Comite Olimpico. Hunto a forma un colaboracion pa coordina e proyecto y pa realis’e ariba un termino corto.

Un danki special ta bay na Setar NV cu a bay di acuerdo pa duna CEDE Aruba e domein www.org.aw pa e proyecto grandi aki. CEDE Aruba ta trahando hunto cu Multimedia NV y Adctra pa e programacion y diseño di e plataforma aki.

Desde juni 2016 ta contactando un cantidad di 600 organisacion pa registra nan mes ariba e Guia Comunitario. Lo acerca tur organisacion ariba tereno social, educativo, recreativo, cultural, vivienda, bario, empleo, salud y medio ambiente. Cada organisacion por registra su informacion online na ORG.aw den su idioma preferi. Despues lo traduci tur informacion den tres idioma: Papiamento, Hulandes y Ingles. Asina e Guia Comunitario lo bira un medio cu por facilita practicamente tur hende cu ta biba na Aruba. Despues di e lansamento, cada organisacion cu ta registra lo ta responsabel pa mantene e informacion “up to date”.

Cu e Guia Comunitario tur hende na Aruba por busca informacion tocante servicionan ariba tereno di bienestar. E Guia Comunitario lo mustra entre otro informacion di contacto, metanan di e organisacion, informacion tocante servicionan, orarionan di oficina y tambe e forma con pa aplica pa un servicio. Lo por busca e servicionan den cada districto y lo por busca tambe den categorianan di servicio. Asina e Guia Comunitario tambe lo bira un medio importante pa trahadornan social, di bienestar y henter e comunidad. Lo por haya bista ariba servicionan cu normalmente no ta facil pa haya.

E domein ORG.aw ta duna e opcion pa ofrece cada organisacion un webpage unico cu ta mara na nan propio perfil online. E Guia Comunitario lo wordo lansa despues di Augustus 2016, depende con lihe tur organisacion ta registra. Pa keda na altura di esaki, registra bo mes na ORG.aw.

E lansamento di e Guia Comunitario ta solamente e prome paso pa modernisa e mercadeo (marketing) di tur organisacion di bienestar. Despues di e lansamento di esaki, CEDE Aruba lo traha ariba diferente proyecto cu ta conecta na e Guia Comunitario, esta un website pa recluta boluntario y un ‘eventcalendar’ pa promociona eventonan di tur e organisacionnan. Na e momento cu tur esaki a ser realisa, probablemente 2017, lo por integra e plataformanan aki den un app, cual lo duna mas opcion ainda pa comunica cu tur organisacion. Pa esaki CEDE Aruba ta hayando conseho di varios organisacion experto ariba e tereno di social media y marketing.

Desde awor caba CEDE Aruba ta gradici e cantidad grandi di e colaboradornan pa nan cooperacion y confiansa den e proyecto aki. Pa mas informacion of sugerencia constructivo tocante e Guia Comunitario por tuma contacto cu Yolanda Richardson-Smit na CEDE Aruba via e-mail info@org.aw of e number di telefon 582-7666.

 


Info / Contact

CEDE Aruba

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw