Graduadonan di “Education Leadership for Collaboration”
Nadine Kirindongo y Jacy Roos-Stamper ta lidernan den enseñansa kende a haci uzo di e oportunidad pa sigui e curso di nuebe luna, “Education Leadership for Collaboration“, cu ta wordo financia door di Onderwijsfonds pa medio di Ministerio di Enseñansa y ofreci pa Universidad di Aruba.
 |
E curso ta di un nivel post-bachelor y ta specificamente diseña cu e meta pa fomenta mas colaboracion entre lidernan den enseñansa di tur scolnan na Aruba, for di kleuter pa scolnan avansa, y enseñansa professional. |
Nadine Kirindongo, kende ta cabesante di St. Franciscus College ta contento di por a haci uzo di e oportunidad pa sigui e curso, cu segun su experiencia ta yud’e den su trabao diario como cabesante.
Kirindongo a gradua pa maestro di scol na aña 2000 y a sigui despues varios curso pa sigui traha riba su desaroyo na bienestar di su alumnonan, pero esaki tabata e prome curso cu el a participa na dje na Universidad di Aruba.
E ta agrega cu e curso a dun’e e instrumentonan pa ta un miho cabesante y, sigur tambe un miho persona.
 |
 |
Jacy Roos-Stamper tambe ta un di e 24 graduadonan cu a completa e opleiding cu ta resorta bao di e Center for Quality Assurance di Universidad di Aruba. E ta splica cu e tabata un proceso amplio, unda cu a trata diferente aspecto di liderazgo cu ta encurasha e persona pa desaroya e lider cu e tin den dje.
Roos-Stamper ta zorg coordinator na Maria College MAVO. El a bisa cu e curso ta yuda e persona cultiva e proceso cu e mester pasa aden pa bira mas fuerte como un lider. E curso a yud’e pa identifica unda e por ta un miho lider na su scol, pero tambe den su bida personal.
E ta remarca cu kier hiba e informacion cu el a adkiri den e team di su scol y aplik’e pa asina na e scol nan cuminsa colabora miho cu otro den e team y cu coleganan di otro scol.
Finalisando el a bisa cu asina lo cuminsa wak un crecemento y union den enseñansa, cu ta algo cu ta mira como “hopi bunita”.
E di tres tanda di e curso aki a cuminsa na Universidad di Aruba. Na 2017 e di cuater y ultimo tanda lo tuma luga.
Info | Contact
Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].
Scroll To Top
