Festival di Buki pa Mucha: Ban lesa, biaha y gosa

September 18, 2019

Biblioteca Nacional Aruba (BNA) ta organisa Festival di Buki pa Mucha. Un proyecto anual pa stimula lesamento cerca tur mucha den comunidad. Lema di e festival pa aña 2019 ta ‘Ban lesa, biaha y gosa’.



Biblioteca Nacional Aruba ta organisa otro edicion di su Festival di Buki pa mucha pa stimula mucha pa lesa y lanta nan interes pa storia y informacion riba mil y un topico. E Festival di Buki pa Mucha ta un siman largo y ta tuma lugar na november. Diferente autor di buki y ilustrador ta bishita scol pa stimula mucha pa lesa. Scol, libreria y otro instancia ta parti di e festival. Atardi 3or, di dialuna pa diahuebs (dia 4 di november pa dia 8) tin actividad na biblioteca mes pa tur mucha.


Escritor

Escritornan cu ta parti di e festival pa aña 2019 ta: Fred Diks, Juliette de Wit. Jeroen Hoogerwerf y Gewout Esselink como ilustrador (Hulanda). For di Corsou biblioteca a invita Tio Ali (Alvin Inecia) y Cathleen Giterson. Di Boneiro ta spera Xiomara Frans-Muller y Denise de Jongh-Rekwest. Pedro Vargas ta bini specialmente for di Colombia.

E grupo di Aruba mes ta consisti di e talentonan creativo: Richard Dabian, Olga Buckley, Shaila Vrolijk-Balgobind, Emerita Emerencia y por ultimo Sergio Tjie A Loi. Esaki ta un grupo di profesional riba tereno di conta storia, skirbi storia pa mucha y ilustra.


Tema y Lema

Den Festival di Buki pa Mucha 2019 e tema ‘Medio di transporte’ (Vervoersmiddelen) ta central.

Cu e lema ‘Ban lesa, biaha y gosa’ biblioteca ta invita mucha pa biaha den buki. E destinacion no ta asina importante sino e medio di transporte. Lesando un buki por descubri espacio cu un raket, experiencia aventura riba un barco di crucero, conoce un pais pa medio di un roadtrip, core den tractor y nabega lama riba un catamaran. Un biahe ta enrikece bo bida y lesando un buki por biaha bay  tur parti di mundo.

Lo tin actividad na scolnan participante y na biblioteca na Playa y San Nicolas den prome siman di november. E librerianan participante tambe ta organisa actividadnan den e siman di buki.

Apertura di e festival lo ta na Cas di Cultura dia 1 di november 2019.


Info / Contact

Biblioteca Nacional Aruba (BNA)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw