Exitoso congreso di IPA

June 8, 2017

Instituto Pedagogico Arubano (IPA) y su Centro di Investigacion y Desaroyo di Enseñansa (CIDE) den colaboracion cu Ministerio di Enseñansa recientemente a tene un congreso sumamente exitoso riba tereno di enseñansa y investigacion.

E congreso titula Transforming Teachers and the Community for the 21st Century through Practitioner Based Research tabata un continuacion di e congreso cu a tuma luga aña pasa den cuadro di e celebracion 25 aña di IPA cu experto renobra profesor Andy Hargreaves di Boston College.

Meta di e congreso di e aña aki tabata pa comparti conocemento y experiencia riba tereno di investigacion practico den enseñansa y comunidadstimula colaboracion entre partner den enseñansa superior y e comunidad di Aruba y Reino Hulandes y principalmente promove hacimento di investigacion bao di docente y alumno di scol riba tur nivel, unda ta stimula y desaroya pensamento critico.

Cada dia tabata bon bishita cu participacion activo di tur participante. Riba 22 di mei e orado principal Dr. Frank Spierings, Lector di Hogeschool Rotterdam a trata e importancia di investigacion practico den enseñansa y comunidad pa stimula un comunidad di conocemento. Tambe tabatin presentacion di drs. Gregory Richardson di IPA y drs. Yolanda Richardson di Universidad di Aruba cu a enfoca riba algun ‘best practices’ innovativo cu ta tuma luga na tur dos institucion.

Prof. Ludo Verhoeven di Universidad di Corsou a duna un charla virtual tocante un programa di investigacion interinsular riba tereno di idioma. Dr. Haime Croes di IPA tambe a duna un presentacion unda a elabora riba IPA su proyecto pa un centro di conocemento riba tereno di enseñansa. Dr. Paula Kibbelaar a fungi como moderador y maestro di ceremonia.

Dia 23 mei tabata specialmente pa maestro di Scol Primario y Secundario. E orado principal tabata Dr. Niek van den Bogert di Hogeschool Rotterdam. El a elabora riba investigacion basa riba practica den enseñansa unda el a mustra ehempelnan practico di con por eherce e tipo di investigacion aki den scolnan.

Banda di esaki tabatin un team di orador, drs. Regine Croes di Proyecto Scol Multilingual, drs. Mirscha Winterdal di IPA, drs. Noemy Croes di IPA y maestro Annaliese Werleman di Colegio San Hose cu a duna un presentacion di ehempelnan bibo di con por aplica investigacion di practica y ‘ontwerpend leren’ den scol cu recurso existente. Drs. Merlynne Williams a fungi como moderador y maestro di ceremonia pa e dia aki.

E ultimo dia, esta dia 24 di mei tabata na encargo di e oradornan di International School Leadership (ISL) program for di Ontario Canada. ISL a trata diferente topico relaciona cu investigacion practico den enseñansa manera entre otro; con pa evalua e proceso di siñamento, con pa colecta dato y con pa formula pregunta. Nan a bisa tambe con importante e cambio di mentalidad ta pa con nos ta wak alumno y enseñansa pa por cosecha exito den e ramo aki.

Durante e tres dianan tabatin oportunidad pa bishita exposicion digital cu investigacion practico di studiante y alumni di IPA. Algun topico tabata entre otro: Disciplina Consciente (Conscious Discipline) den scol basico, importancia di movecion den kleuter, rekendidactiek in het kleuteronderwijs y muziek curriculum in het onderwijs.

Un palabra di gratitud ta bay na Ministerio di Enseñansa, patronisador y institutonan academico y scolnan pa nan colaboracion pa e magno evento aki. Pa medio di nan sosten nan ta mustra nan compromiso y interes den nos enseñansa y den formacion di maestro. Masha danki di curason.

 
 
 
 

 


Info / Contact

Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu IPA

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw