Entusiasmo bou esnan cu a start e GED program

August 15, 2017

Ministerio di Enseñansa hunto cu International School of Aruba recientemente a introduci e General Education Development (GED), un programa di preparacion y serie di test internacionalmente reconoci na nivel di enseñansa secundario cu ta conduci na un certificado cu credencial ekivalente na un U.S. High School Diploma.

E programa aki ta brinda un oportunidad na esnan cu ainda no a logra un diploma na nivel di Enseñansa Secundario, of pa esnan cu a caba enseñansa cu no ta suficiente pa sigui studia na nivel di Enseñansa Superior, of asta pa personanan cu ta trahando caba pero ta desea di sigui crece na nan compania.

Minister di Enseñansa Michelle Hooyboer-Winklaar a expresa di a hay’e impresionante pa por presencia 135 studiante di diferente edad, bario, cu diferente nivel di enseñansa y nivel socio-economico, cada un cu storianan di bida inspirativo, uni cu perseverancia pa logra e mesun meta: haal nan GED pa asina nan por tin mas oportunidad den bida.

 

Reyvick Piña ta un di e personanan cu lo beneficia di e programa aki y ta pensa cu e programa GED lo yud’e pa tin un miho futuro. Nunca el a haya un diploma di scol pero e kier crea un miho futuro pa su mes den e areanan di trabou cu e tin experiencia caba den dje cual ta Turismo y Horeca.

E motibo pakico e no a caba scol (EPB Horeca) ta pa motibo di problema cu bullying. Despues cu e tabata mucho grandi pa bay scol den dia, e unico opcion p’e tabata di bay Avond MAVO. Asina diferente factor a kibra su motivacion di sigui bay scol ya cu no tin control riba kico ta pasando, el a expresa.

Awo e ta den e programa di GED cu su ruman homber, kende a pasa den situacion similar y kende a motiv’e pa bay scol bek. Piña ta contento cu e programa GED, pasobra e lo kier sigui studia afo.

 

Chris Piña, ruman di Reyvick, a sigui bisa cu prome cu e programa di GED e tabata bayendo Colegio dos aña pasa, pero el a “drop-out” paso e no a sinti su mes confortabel na e scol.

Pa loke ta e rekisitonan pa drenta, el a bisa cu esaki a bay facil. El a wordo entrevista di biaha y el a haya un e-mail basta lihe cu a indica cu a acept’e.

E programa aki ta na idioma Ingles y esey e ta haya tremendo pasobra e ta miho den Ingles compara cu Hulandes.

Mi plannan aworaki ta pa bay studia afo. Por ta Canada cu ta un di mi prome escogencianan,  Piña a indica. 

 

Banda di esaki, Stanson Tromp, cu tabata den brug klas na Maria College tabata bayendo bon. Su ruman homber a bay Colegio Arubano y semper el a mira su ruman como role-model. Esey a pone den un situacion unda e tabata mira cu su ruman a bay HAVO y el a bay MAVO. El a traha duro y el a logra bay Colegio Arubano unda el a realisa cu el a haci un fout. Su prome cifra di Wiskunde tabata un 2.7 y ta e ora ey cu el a ripara cu mester a bay traha mas duro ainda. Sinembargo, cu hopi trabou el a bay over pa HAVO-3.

Den HAVO-4 el a keda sinta. Aunke su actitud tabata positivo, el a dicidi di bay Avond-HAVO. E prome aña debi na problemanan personal e no por a caba scol. E di dos aña, el a logra bay over, pero tabatin dos vak cu e tabatin problema cun’e cu ta Spaans y Economie.

Ya caba e tabatin e programa di GED den su mente y esaki tabata e solucion perfecto p’e, a bisa. E ta gusta cu e ta na idioma Ingles y te awo e no a ni cuminsa y ya caba mi ta stim’eStanson a manifesta. E tabata traha na Parke Nacional Arikok como un parkranger destaca, pero e tabata haya fastioso cu e no tin un diploma como backup. Nelson Mandela a bisa cu un diploma ta fundeshi di e exito, el a indica. P’esey el a pensa cu pa e por beneficia Parke Nacional y naturalesa di Aruba, cu ta mas eficiente pa e haya e diploma aki. Su meta y su motivacion ta pa sigui cu e programa y haya su diploma. “Dia cu mi a haya notificacion cu a acepta mi den e programa, tabata un di e dianan mas feliz di mi bidaStanson Tromp a finalisa bisando.

Mas informacion

International School of Aruba (ISA) a desaroya un website unda cu tur informacion di e GED program ta wordo publica: [gedaruba.com]. Tur interesado por registra via di e website pa keda na altura di tur informacion y updates.

 


Info | Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw