Educacion Basico: Focus op Geletterdheid

August 18, 2016

Na maart 2016 Departamento di Enseñansa a cuminsa cu e proyecto di Educacion Basico: “Focus op Geletterdheid” riba tereno di Enseñansa pa Adulto. E proyecto aki tin como meta pa hisa e grado di educacion di adulto na Aruba.

E grupo meta ta e adulto cu ta biba na Aruba cu no a alcansa e nivel final di ciclo basico di educacion secundario (seis aña di scol primario y dos aña di ciclo basico di MAVO/EPB).

E proyecto aki ta wordo subsidia door di Fondo Desaroyo Arubano (FDA) y lo sigui te December 2016.

 

Meerjarenplan

E producto final lo ta un documento di conseho y un “meerjarenplan” enfoca riba e sistema di alfabetisacion cu lo mester wordo aproba pa Minister di Enseñansa. Esaki cu e proposito pa hisa e nivel di alfabetismo di e poblacion di adulto na Aruba. Asina lo promove oportunidad pa crecemento riba tereno laboral, continuacion di estudio y miho integracion den nos comunidad pa e ciudadano Arubiano.

Na mei 2016 Departamento di Enseñansa a organisa varios encuentro. Stakeholders di diferente departamento publico hunto cu Departamento di Enseñansa Adviesbureau CINOP di Hulanda a reuni pa intercambia idea.

Conferencia

Na prome instante e diferente encuentronan a tuma luga pa cera conoci cu e tereno di Enseñansa pa Adulto y pa haya sa kico ta existi caba na Aruba riba tereno di Enseñansa pa Adulto.

Considerando e necesidad pa bay mas a fondo cu mas stakeholder riba e topico y e necesidad pa obtene input respecto e establecimento di un sistema di alfabetisacion na Aruba, Departamento di Enseñansa Aruba ta organisa na Aruba Marriott Resort un conferencia diabierna 19 di augustus 2016 cu varios stakeholder riba e topico menciona.

E personanan cu lo forma parti di e conferencia aki ta forma parti di diferente organisacion (semi) privafundacion y departamento publico. Riba e dia aki lo tuma luga workshop riba varios topico y alabes lo tin dialogo entre diferente organisacion pa asina e expertonan comparti nan conocemento, necesidad y locual ta considera prioridad riba e topico di alfabetisacion pa adulto.

Adviesbureau CINOP di Hulanda lo ta presente pa contribui cu su experticio riba e tereno aki.

Unabes cu adkiri tur e informacionnan ricibi durante e conferencia lo traha un documento di conseho y un “meerjarenplan” cu lo wordo presenta na Minister di Enseñansa pa aprobacion. Na final di november 2016 lo oficialmente presenta e conseho y plan aproba durante un otro conferencia.

Departamento di Enseñansa Aruba kier a gradici tur hende cu ta forma parti di e organisacionnan publico, fundacionnan y e sector priva pa e sosten ricibi y ta spera di por conta cu nan sosten den e fase di implementacion. Alabes Departamento di Enseñansa Aruba ta desea tur actor exito cu e conferencia importante aki!

 


Info / Contact

Pa mas informacion por busca den e alfabet menu riba homepage: [E] Educacion pa Adulto of por tuma contacto cu: DEA > afdeling Scholing

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw