E di 6 rapport riba tratado di Hende Muhe
Recientemente a tuma luga e di 65 sesion di e “Convention on the Elimination of All Forms of Discrimination against Women” (CEDAW) di Nacionnan Uni, na Geneve, Suisa.
 |
E tratado cu ta regarda proteccion di derechonan di hende muhe cu a drenta na vigor na aña 1981 y a wordo ratifica door di 189 pais rond mundo. Cada pais tin e obligacion pa raporta periodicamente e progreso cu e pais a logra pa implementacion di e varios articulonan.
A toca turno pa Reino Hulandes presenta nan reportahe, consistiendo di 4 rapport independiente cu ta representa cada pais den Reino. Na Aruba tin 58,000 hende muhe cu ta representa 53% di e poblacion.
Minister Michelle Hooyboer- Winklaar pa di dos biaha a presenta CEDAW Rapport na Nacionnan Uni, hunto cu Minister Jet Bussemaker y representantenan di Corsou y di St. Maarten.
E rapport ta cubri varios informacion tocante e situacion di hende muhe relaciona cu participacion laboral, salubridad, participacion politico, educacion, discriminacion, violencia domestico y otro temanan.
Minister Hooyboer a presenta varios indicadornan y un compromiso pa pais Aruba sigui traha riba e progreso di hende muhe te na momento cu e convenio wordo implementa completo.
E comision di Nacionnan Uni lo entrega e recomendacionnan final a base di e informacion presenta durante e re y e observacionnan.
 |
Info / Contact
Pa mas informacion por busca den e alfabet menu riba homepage: [M] Ministerio di Enseñansa
Scroll To Top
