Double Degree Master International Tax Law

February 23, 2016

Dia 11 di februari ultimo a tuma luga e formalisacion di un acuerdo di colaboracion hopi importante entre Universidad di Aruba y Universidad di Maastricht.

Minister di Enseñansa sra. Hooyboer-Winklaar, hunto cu rector di Universidad di Aruba, dr. Thode y dr. Hammers representando Universidad di Maastricht a formalisa e acuerdo pa asina duna inicio oficial na e trayecto pa ofrece e Master opleiding den International Tax Law cu lo wordo ofreci na Aruba door di ambos instituto.

E acuerdo aki ta wordo formalisa despues di varios luna di preparacion door di ambos Universidad y den contacto y colaboracion estrecho cu Ministerio di Enseñansa di Aruba y Ministerio di Enseñansa, Ciencia y Cultura di Hulanda.

E estudio aki ta uno particular y hopi special mirando cu e ta un Double Degree Program y cu lo conduci na final di e estudio na dos diploma, un di Universidad di Aruba como tambe un diploma di Universidad di Maastricht.

Esaki ta algo unico cu ta haci e estudio aki sumamente atractivo pa studiantenan y profesionalnan local, pero tambe esnan regional y hasta internacional. E acuerdo aki ta un stap grandi pa Universidad di Aruba y ta confirma e calidad cu nos Universidad local ta brinda y e confiansa cu partnernan internacional tin den nos Universidad local.

Universidad di Aruba di e manera aki ta posiciona su mes hopi fuerte riba e mercado internacional cu un estudio di calidad cu lo wordo ofreci na Ingles cu un partner Europeo reconoci.

Cu e Double Degree hunto cu Universidad di Maastricht y otro iniciativanan manera e cooperacion cu Universidad di South Carolina y tambe e programa di intercambio Erasmus+ Universidad di Aruba ta fortificando su red di partners y ta profilando su mes como un Universidad dinamico, diverso y internacional.

Door di e Master den International Tax Law Universidad di Aruba hunto cu Universidad di Maastricht ta bira pionero tambe den reino pa loke ta Double Degree Programs y ta permira cu esaki lo stimula mas iniciativa similar na Aruba pero tambe na e otro paisnan den reino.

Minister Hooyboer-Winklaar ta sumamente orguyoso cu e logro aki y ta hopi entusiasma pa e trayecto nos dilanti y tambe tur e oportunidadnan cu e iniciativa aki lo trece cune.

“Hunto cu Universidad di Aruba nos lo sigui explora e posibilidadnan pa expande e oportunidadnan di estudio na Aruba mes y haci estudionan internacional accesibel pa nos studiantenan y profesionnalnan local” Minister Hooyboer-Winklaar a subraya.

E titular di enseñansa ta indica cu e espacio cu nos tin awo bou di e ley di enseñansa superior di Hulanda lo por facilita mas tipo di Double Degrees na Aruba y esaki ta algo cu sigur cu lo kier beneficia di dje na un manera optimal y haci bon uzo di e ventaha cu nos tin como partnernan den Reino Hulandes.

“Mi ta felicita Universidad di Aruba cu e logro grandi aki y ta gradici tur esnan cu a traha incansablemente pa haci e iniciativa aki posibel”, Minister Hooyboer-Winklaar a bias.

 


Info | Contact

Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw