Search Facebook Instagram Twitter

Docentenan di Colegio Arubano ta prepara pa enseñansa online

August 27, 2020

E trahamento di un Powerpoint casi tur hende por, pero con por haci e slidenan aki interactivo? Y con por haci sesion live via Google Meet cu bo klas, cu ayudo di interactive whiteboard Jamboard? Y con e generacion aki, e generacion Z, ta siña? Tur e preguntanan aki y mas tabata puntonan central durante e dianan di estudio dia 25 y 26 di augustus, na cual tur e docentenan di Colegio Arubano a participa.



Desde e lockdown di e isla na maart, enseñansa digital a haya un boost enorme na Colegio Arubano.Sinembargo, e sentimento cerca e docentenan ta cu enseñansa no mester sosode riba distancia, sino den klas. Door di e situacion di Covid-19 actual, a pospone e apertura di scol cu dos siman y esaki tin un caracter diferente cu normal.Colegio Arubano a tuma decision cu ta cuminsa dialuna 31 di augustus cu e lesnan online y pa e motibo aki mes, a organisa e dianan di estudio e siman prome cu aña escolar 2020-2021 habri.


Buki y herment online

Dia prome di augustus, señor Tim Croes, a cuminsa eherce su funcion di rector di Colegio Arubano. E ta mira e medionan digital como un herment extra pa e docentenan.”Un buki ta keda necesario den enseñansa, banda di online tools”, tabata su palabranan riba e prome dia di estudio na Colegio Arubano. Segun Croes, e docentenan mester haya e conocemento ta con ta traha cu e hermentnan aki. Pesey a ofrece workshop tocante e posibilidadnan di enseñansa digital durante dos dia. Acerca, nan a practica cu nan mesun materia. E facilitadonan di University of Aruba, IPA y coleganan di Colegio Arubano a inspira e docentenan y comparti nan conocemento den e proceso di desaroyo di e lesnan digital. Pa medio di esaki, ta gradici e profesionalnan aki un biaha mas pa nan contribucion balioso na bienestar di enseñansa na Colegio.


Digitalisacion como punto central

“Naturalmente e adkisicion di e conocemento digital y e aplicacion di esaki den les no ta caba cu e dianan di estudio aki,” Tim Croes a vocifera.”Lo duna mas atencion na esaki den futuro cercano. Digitalisacion ta un herment necesario den e vision di enseñansa cu nos ta desaroya. E ta un proceso di siñamento, den cual ta laga e docentenan liber pa nan investiga loke ta cuadra cu nan estilo.” E rector ta contento cu e resultado y e evaluacion positivo ricibi relaciona cu e dianan di estudio.”Cu esaki nos a pone un fundeshi fuerte pa enseñansa digital, cu ta di importancia pa enseñansa durante e situacion actual di pandemia.”

Gobierno a dicidi cu ta habri e scolnan diahuebs dia 3 di september, sinembargo esaki por cambia si tin cambio relaciona cu Covid-19. Esakita loke e docentenan no ta spera; nan ta entusiasma pa ricibi nan alumnonan fisicamente despues di algun luna.


Pa mas informacion comunica cu: Tim Croes, rector Colegio Arubano. Mail: tim.croes@colegioarubano.aw


Info / Contact

Colegio Arubano

Scroll To Top
  • © 2011-2021 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets