Construccion pa Prinses Amalia Basisschool a cuminsa

June 27, 2016

Recientemente a celebra un ocacion importante pa Prinses Amalia Basisschool cu develo di e borchi cu ta indica cu e construccion di nan scol nobo a cuminsa.

Actualmente e scol ta situa den un edificio banda di NV Elmar den Wilhelminastraat pero tin difirente problema cu dak y e sistema di coriente. Despues di ta varios aña riba e lista di construccion, a pasa e proceso largo pa aprobacion via FDA y DOW a tuma mas o menos 6 luna pa planea e trabou completo. Na luna di mei 2016 a start cu e trabounan y ta premira cu lo keda cla na april 2017.

Scol Basico Prinses Amalia nobo lo ta situa banda di Colegio EPI na Sero Blanco. Gobierno a scoge e tereno ey hopi aña pasa, pero e proyecto nunca a cuminsa. E lo ta situa strategicamente teniendo cuenta cu trafico y residencianan entre otro.

E scol lo tin 12 klas pa e 310 alumnonan cu ta bishitando e scol basico, parti di 1ste pa 6de klas. E scol nobo lo tin tur facilidad pa por duna les den e epoca aki, mas eficiente, mas moderno y un ambiente mas agradabel pa por haya les aden.

A aloca no menos di 5.6 miyon florin pa e proyecto aki y e trabou di construccion lo ta den man di Van Kessel Construction, cu ta e compania cu a gana e destaho publico.

Cabesante: Prinses Amalia Basisschool ta hopi contento cu edificio nobo

Juffrouw Roelien Hofman, kende ta cabesante actual di e scol a bisa cu tur hende ta hopi contento cu e desaroyo aki, como cu e ta entre otro facilita e introduccion di modernisacion den enseñansa pa nan scol. “Pa nos esaki ta nifica algo hopi bunita” Hofman a expresa, como cu nan no lo tin retonan mas cu por ehempel coriente cu ta instabiel y daknan cu ta lek.

E cabesante a remarca cu un caracteristica cu mas nan ta aprecia di e edificio nobo, ta cu lo tin espacionan nobo, como cu actualmente entre otro no tin luga adecua pa haci extra “begeleiding”.

E 310 alumnonan di Prinses Amalia Basisschool ta hopi motiva caba, Juffrouw Hofman a bisa. “Claro cu nan ta hopi contento cu esaki” el a bisa, y a agrega cu aunke e ta spera cu e scol nobo lo añadi na nan motivacion e no ta kere cu lo tin un cambio grandi den nan actitud, pero si den e forma cu algun cos ta wordo haci.

El a splica cu e parti mas grandi di ful e planning a tuma luga bou di e cabesante anterior, Juffrouw Mireya de Haseth. E scol nobo no lo conoce un expansion den e cantidad di klasnan. E scol lo keda cu 12 klas, y esey ta un bon tamaño pa un scol, Hofman a bias.

 


Info / Contact

Pa mas informacion por busca den e alfabet menu riba homepage:  [F] Faciliteiten  of [O] Onderhoud Scholen.

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw