Conferencia Internacional di Educacion “Atlantic Rim Collaboratory”

September 19, 2016

Recientemente a tuma luga e prome edicion di e conferencia internacional di educacion Atlantic Rim Collaboratory na Reykjavik, IcelandAruba tabata entre 7 otro pais y region como co-fundadonan di e conferencia aki cu mester conduci na mas colaboracion internacional den enseñansa riba e topiconan di accesibilidadhusticia socialoportunidad igual bienestar general di studiantenan den sistemanan educacional rond di mundo.

Minister di Enseñansa y Famia Michelle Hooyboer-Winklaar, representante di Ministerio di Enseñansa y directora general nobo di Instituto Pedagogico Arubano Marilyn Richardson a representa Aruba na e conferencia cu a tuma luga durante e siman di 12 di september.

Paisnan participante

E paisnan y regionnan representando nan sistema educacional ademas di Aruba cu a bin hunto pa e conferencia aki ta entre otro IcelandFinlandScotlandIrelandCanada y Merca.

Cada pais of region a wordo representa pa nan maximo mandatario riba e tereno di enseñansa y asina Aruba por a conoce y intercambia di cerca cu entre otro Ministernan di enseñansa di Iceland y Scotland como tambe e Minister di e provincia di Ontario Canada y e secretaria general di educacion pa e estado di Vermont na Merca.

Tambe tabatin varios profesional y experto presente di entre otro SingaporeAustraliaNorway y Colombia cu a comparti nan conocemento y perspectiva riba e topiconan riba cual a concentra.

Un di e expertonan mundialmente famoso cu a participa na e conferencia ta Sir Ken Robinson, conoci pa su investigacionnan y tur su charlanan critico riba sistemanan educacional tradicional.

Sistema di educacion na Iceland

Prome cu e conferencia e delegacionnan a haya e oportunidad di bishita diferente scol na Reykjavik y asina haya un bista di e sistema educacional di e pais. Loke ta haci Iceland hopi interesante ta cu e ta un isla relativamente grandi compara cu Aruba pero cu conoce solamente 330.000 habitante di diferente descendencia. E pais tambe conoce un sector di turismo cu a bin ta creciendo den forma explosivo durante e ultimo añanan.

Minister Hooyboer-Winklaar a menciona cu e tabata sumamente interesante pa e delegacionnan mira tur implicacion di e desaroyo  y e contexto specifico aki di e isla tin riba e sistema educacional y con e pais y e scolnan ta reacciona y adapta na esaki.

Conferencia

Durante e dianan di e conferencia mes a concentra riba e topiconan menciona unda cada pais a presenta nan retonan di mas grandi y tambe e vision, maneho y accionnan cu ta ehecutando riba nivel nacional. Cada pais cu a participa na e conferencia tin un compromiso grandi pa haci e adaptacionnan necesario den nan sistema educacional pa haci esaki uno mas inclusivo, mas accesibel, mas husto y cu mas atencion pa e bienestar general di e studiantenan.

Accesibilidad y oportunidad igual

Un di conclusionnan mas importante di e conferencia ta cu no por existi asina yama “dead-ends” den un sistema educacional. Mester crea opcion unda cu no tin alternativa y mester elimina cualkier obstaculo pa alumnonan por sigui studia.

Minister Hooyboer-Winklaar ta comparti e pensamento aki completamente y ta indica cu esaki ta un di e prioridadnan mas halto den e maneho di enseñansa cu Aruba ta bin ta hibando pa e ultimo añanan.

Ora ta trata e tema di cambio of reforma den enseñansa, hopi biaha nos ta scucha cu esaki ta urgente, y di berdad nos tin cu cambia y adapta nos sistema di enseñansa. Pero hopi biaha ora yega e momento pa introduci e cambio, aunke chikito mes, nos ta experencia hopi resistencia. Na un banda e no ta un sorpresa, mirando cu cambio por haci hende incomodo y saca nos for di nos comfort zone, pero si nos tin un compromiso pa crea un sistema di enseñansa cu ta mas husto y accesibel y ta traha pa tur studiante, ta solamente door di cambio nos lo logr’e, asina Minister Hooyboer-Winklaar a splica.

E titular di enseñansa a sigui bisa cu na Iceland hunto cu e demas paisnan nos a haya e reconfirmacion cu esaki ta crucial y cu cada pais tin esaki como prioridad y ta accentua e importancia.

E experto dr. Pasi Sahlberg di Finland, cual pais ta conoci internacionalmente pa un di e sistemanan educacional mas miho na mundo, ta accentua cu excelencia y calidad den bo sistema educacional ta bay man den man cu e aspectonan di accesibilidad y oportunidad igual. No por perde inclusion y accesibilidad for di bista ora cu ta traha riba calidad segun dr. Sahlberg.

Clausura

E conferencia a conclui cu diferente palabracion entre e paisnan pa asina por sigui coopera cu otro riba e temanan aki. E palabracionnan ta inclui “peer review” riba maneho y iniciativanan como tambe e desaroyo conhunto di indicadornan nobo pa por haci investigacion y midi progreso riba e areanan menciona.

Otro aña lo tene e siguiente conferencia y Aruba ta un di e candidatonan pa ta anfitrion di esaki. Ya ta premira cu lo tin varios otro pais y region cu lo uni na e iniciativa aki y cu lo participa na e conferencia otro aña.

Minister Hooyboer-Winklaar ta menciona di ta hopi contento y satisfecho cu e participacion di Aruba. Nos pais, aunke chikito, tabatin un contribucion hopi grandi na e conferencia aki y e tabata hopi bon pa mira cu nos ta moviendo den e bon direccion hunto cu e resto di mundo.

Pa mas informacion di e conferencia por subi e website atrico.org.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw