Search Facebook Instagram Twitter

Colegio San Augustin renoba

June 28, 2016

Durante un bishita cu a inclui un recorido di e parti renoba, como tambe e expansion di e edificionan di Colegio San Augustin, Minister di Enseñansa Michelle Hooyboer-Winklaar a anuncia cu e scol ta habri bek na augustus 2016.

Algun luna pasa e mandatario a bishita e scol pa haya un bista di e progreso, y siman pasa a bolbe hunto cu personanan cu ta liga cu e scol, incluyendo e Cabesante di e scol, sra. Maribel Geerman-Lampe y ex-cabesante di e scol, esta Parlamentario sr. Jeffrey Kelly. Tambe presente tabata miembronan di Parlamento sra. Lorna Varlack y sra. Clarissca Velasquez.

Minister Hooyboer-Winklaar a splica cu na cuminsamento di e aña academico 2016-2017, e team di e scol y nan alumnonan lo ta den edificionan renoba y un parti nobo, cu cuater lokaal adicional y elementonan clave cu ta brinda miho posibilidadnan di aceso pa personanan cu deshabilidad fisico. Esakinan tabata inversionnan necesario pa un enseñansa moderno, el a agrega.

E minister a expresa cu e ta contento di por wak e renobacion realisa y e ampliacion completo, particularmente como cu ta trata di un scol cu ta presta asina bon den e ultimo añanan, unda cu ta conta cu alumnonan cu ta sali entre e mihonan riba nos isla.​

E infrastructura di e edificio renoba y amplia ta pas cu e motivacion y dedicacion na enseñansa cu ta wordo desplega pa e team completo y tur e alumnonan di Colegio San ​Augustin, e mandatario a conclui bisando despues di su recorido na e scol.

 


Info / Contact

Pa mas informacion por busca den e alfabet menu riba homepage:  [F] Faciliteiten  of [O] Onderhoud Scholen.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets