Celebracion pa 15 aña di oficialisacion di Papiamento

May 16, 2018

Diasabra, dia 19 di mei, pueblo di Aruba por topa na Plaza Padu y bisindario, pa celebra e echo cu 15 aña pasa Papiamento a bira idioma oficial.

Oficialisacion di Papiamento ta un reconocemento importante cu ta indica cu e pueblo Arubiano a cuminsa duna su idioma e balor cu e merece.

Cu e Feria di Papiamento nos ta celebra e rikesa di Papiamento y e echo cu Papiamento ta fuertemente hancra den nos comunidad.

Pueblo a cuminsa laga su miedo y inseguridad relaciona cu su propio idioma un banda y a cuminsa brasa e tesoro aki.

Padu, Rufo y Lio a simbolisa esaki den “Aruba dushi tera” cu ta demostra cu ta den nos idioma Papiamento so nos himno por ta. Scohencia di Plaza Padu pa e feria aki no ta un casualidad.

E comision organisado hunto cu e tantisimo boluntarionan entusiasma (mira e potretnan) a keda cla cu e programanan den tempo record. Cooperacion di un y tur tabata y ta fantastico. Ta importante pa menciona cu na e feria aki tin masha hopi actividad pareu. Cada actividad tin su programa special, p.e. e weganan di mucha, e charla- y lesnan, e cinenan, e contamento di cuenta y declamacion, musica, presentacion di buki. E programa lo ta poni na e tent concerni y lo parti un foyeto cu tur e actividadnan.

Di algun di e programanan ta importante pa sa e programa di antemano, por ehempel e programa di les y charla. Programa di les y charla lo tuma luga den Sala di reunion di Cosecha.


Programa

Orario Orador/Docente  Topico
 17.00 – 17.20  Angelique Maduro  Promocion di Literatura (ch)
 17.30 – 17.50  Cesar Kelly  Bon uzo di Papiamento (l)
 18.00 – 18.20  Ramon Todd Dandaré  Evolucion y emancipacion di Papiamento (ch)
 18.30 – 18.50  Pedro Velásquez  E ley di oficialisacion (ch)
 19.00 – 19.20  Candy Dirks  Ortografia (l)
 19.30 – 19.50  Ramon Todd Dandaré  Structura di Papiamento (l)
 20.00 – 20.20  Selvia Lumenier  Palabra componi (l)
 20.30 – 20.50  Régine Croes  Proyecto Scol Multilingual (ch)
 21.00 – 21.20  Merlynne Williams  E shimarucu (ch)
 21.30 – 21.50  Candy Dirksz  Dicho y Proverbio (l)

 

Interesante tambe ta e weganan di antes di mucha cu John Freddy, Lupita y  Alvaro a prepara. Ata aki pa refresca memoria di hopi di nos: rey/jacks, stinki, molina, pele, stelten, core wiel cu tayer, bula cabuya, wega di cashupete, djul, trom, cancho y cu cantica luna cu solo, mi tin un bala, pisca letter, m’a cay den pos. Nos ta ban hunga?

Tambe ta bon pa sa cu e siguiente autornan lo ta presente pa conta di nan buki y pa bende esaki: Edseline Figaroa, Romulo Fingal,  Frank Williams, Irmgard Frans, Ruthy Vrieswijk. Amy Paesch lo representa Padu Lampe cu e reedicion di “Harmonologia”.

E programa di musica ta masha largo mes y detaya. Esey ta keda sorpresa.

Nos ta invita pueblo un biaha mas pa acudi diasabra awor na Plaza Padu pa un evento cu bo lo no lubida nunca.


Info / Contact

Pa mas informacion por busca [P] Papiamento den e alfabet menu riba homepage.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw