Encuentro entre Cas di Aruba y POC

July 21, 2018

Den Haag – Na Cas di Aruba (Arubahuis) a tuma luga un encuentro informal cu e miembronan di e Plaatselijke Opvangcommissies (POC).

E POC ta consisti di studiantenan di Aruba cu ya caba ta studiando na Hulanda y cu conhuntamente cu e studiementor ta organisa e opvang pa e grupo di studiante cu ta biniendo Hulanda pa cuminsa cu nan estudio. Cas di Aruba tin gratitud grandi pa e trabou di e POC den opvang di studiante.

Coordinador di e afdeling Onderwijs di Cas di Aruba James van der Linde a yama e miembronan di e POC nan y e studiementornan bonbini y a bisa di ta contento cu hopi miembro di e POC a acepta e invitacion.

Van de Linde a anuncia cu e aña aki lo tin un solo vuelo for di Aruba y cu esaki lo yega riba diadomingo 5 di augustus cu 170 studiante abordo. Tin algun studiante cu ya caba a bin Hulanda, of cu lo yega prome of despues di e grupo grandi di 5 di augustus. ‘Pa Cas di Aruba esaki ta hopi mas eficiente, y tambe pa e POC nan ta hopi bon, ya cu dialuna 6 di augustus por cuminsa cu e
programa di opvang,’ asina van der Linde a bisa.

Finalmente James van der Linde a haci un apelacion grandi riba e studiantenan presente pa participa den e Studentscampaign di Arubahuis pa manda nan videonan cu tipsnan pa e studiantenan cu ta preparando pa bin Hulanda.

Minister Plenipotenciario Guillfred Besaril mescos cu James van der Linde a acentua den su discurso e trabou importante cu e POC tin pa cu e grupo di studiante cu ta yega Hulanda. E mandatario a para keto na e preparacion cu e studiante mester haya prome cu e bin Hulanda. ‘Pesey nos di Cas di Aruba a bay na juni ultimo pa duna informacion na e studiantenan cu a slaag y a scoge pa bin Hulanda. Esaki ta eigenlijk e di dos paso den e trayecto. E prome paso mester ta na november of cuminsamento di december – prome cu e studiante scoge ki estudio e kier bay haci – pa duna informacion na Aruba riba e posibilidadnan y diversidad di estudionan. Pero primordial ta cu nos mester prepara nos studiantenan riba profesionan cu Aruba mester di dje. Ta importante pa bin cu un planificacion pa e siguiente 5 of 10 aña. Asina aki e studiante por scoge un estudio, na unda e posiblidad pa regresa Aruba y haya un trabou ta hopi mas grandi,’ asina sr. Besaril a bisa.

E mandatario a enfatisa e importancia pa Cas di Aruba traha hunto cu e POC-nan y e studiementornan pa asina trece Cas di Aruba mas cerca di e studiantenan. ‘Boso tin e ventaha cu boso ta papia e mesun idioma cu e studiantenan y asina comparti boso experencia cu esnan cu ta yega nobo. Hopi di nan no tin e conocemento kico ta e bida di studiante na Hulanda: leu for di bo mayornan, para riba bo mesun pia y regla bo mesun asuntonan. Akinan boso por brinda un man pa guianan den e prome lunanan na Hulanda,’ asina Minister Besaril a bisa.

E potretnan ta cortesia di Cas di Aruba


Info / Contact

Pa mas informacion por tuma contacto cu: [Kabinet van de Gevolmachtigde Minister van Aruba – Arubahuis].

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw