Bachelor OGM na UA

April 1, 2016

Pa esnan cu tin ambicion pa un carera como consehero, manager, consultant of researcher, Universidad di Aruba (UA) su Faculty of Arts and Science (FAS) desde aña 2009 ta ofrece e estudio Organization, Governance and Management (OGM).

 

E programa di estudio OGM ta hopi interesante como cu e ta prepara e studiante pa ta consehero (beleidsmedewerker) den sector publico, sector social y sector priva, pero alavez e studiante por specialisa su mes pa ta manager.

E puntonan di enfoke den e programa ta lesnan di practica, teoria y investigacion (research), informacion di sciencia di organisacion (organisatiekunde y bestuurskunde). Tambe e programa ta pone enfasis riba desaroyonan global actual y asuntonan relaciona cu e situacionnan local.

E proyectonan cu e studiantenan ta involvi cu ne ta por ehempel e Projecto Rancho, Proyecto Conserva Nos Cultura y Aruba Doet.

Universidad di Aruba ta invita cordialmente pa cuminsa cu e estudio di Bachelor OGM na augustus benidero:

Universidad di Aruba ta haci un yamada na e hobennan cu ta den examenklas na Colegio Arubano, Colegio San Nicolas, Colegio EPI, International School of Aruba (ISA), Schakel College of Ibero American Highschool pa registra.

Universidad di Aruba tambe ta informa esnan cu ya tin un carera den sector publico, sector social of priva y cu ta interesa pa amplia nan conocemento den tur aspecto di organisacion, management y governance cu nan por inscribi pa e estudio completo of pa algun curso di nan interes.

Pa mas informacion di e estudio di OGM por bishita e pagina di web di Universidad di Aruba: ua.aw/OGM.

 

Collegegeld UA

collegegeld pa e aña academico nobo, cu ta cuminsa na augustus 2016 lo ta:

E studiantenan cu no tin paspoort Hulandes ta wordo considera studiante internacional” y pa esey tin un otro tarifa. Pa mas informacion encuanto e tarifa internacional por tuma contacto cu e administracion di studiante via email na: osa@ua.aw.

Areglo di pago

Durante e anochi di informacion cu lo tuma luga diahuebs dia 7 di april 2016 lo tin e oportunidad pa haya mas informacion tocante e areglo di pago cu UA ta ofrece pa cu collegegeld.

Arubalening pa studia na Universidad di Aruba

Land Aruba ta brinda studiantenan cu ta bay sigui cu nan estudio na Aruba of den exterior un prestamo pa estudio. E prestamo aki yama Arubalening. Intencion di e Arubalening ta pa facilita e studiante cu su gastonan di nan estudio. Un studiante di Aruba por bin na remarca pa e producto “Arubalening UA”. Na Departamento di Enseñansa Aruba (DEA) seccion Studiefaciliteiten ta encarga cu Arubalening. Un representante di e seccion lo ta presente na e Open House di UA pa duna informacion y contesta preguntanan tocante e Arubalening.

Mas informacion: [Financiamento di estudio | Arubalening] |  [Arubalening bedragen]

Registracion 2016-2017

Universidad di Aruba ta invita tur esnan interesa pa studia na nivel Bachelor of Master pa registra na tempo. E periodo pa registracion ta habri dia 15 di mei 2016 te cu 15 di juli 2016.  Tur registracion ta bay via e website di UA: ua.aw. Cuminsando dia 15 di mei, 2016 e link pa registra lo ta publica riba e website. Despues di dia 15 di juli 2016 lo por registra ainda  pero e studiante lo mester paga un “late registration fee”.

Kiko ta e beneficionan di studia na Universidad di Aruba?

  1. E klasnan ta chikito, cu tur facilidad moderno.
  2. Tin facilidad di IT, biblioteca y espacio pa studia. Tin espacio pa studia na e edificio na J.E. Irausquinplein y na esun na L.G. Smith Boulevard (pabou di ex-Superfood). Como cu e gruponan ta chikito, tin hopi guia y atencion personal pa tur studiante. E studiantenan ta haya hopi oportunidad pa acerca e diferente docentenan pa guia.
  3. Fuera di e atencion cu nan ta ricibi di e personal di nan facultad y di e docentenan, tin tambe diferente servicio di sosten, manera e oficina di asunto di studiante y un oficina di guia psicologico. Tur e servicionan y sosten ta contribui cu e studiantenan por caba nan estudio cu exito.
  4. E studiantenan ta siña traha den team den diferente proyectonan cu e studiantenan local, studiantenan di e otro facultad y studiantenan di universidadnan internacional o regional.
  5. Tin algun proyecto cu e studiantenan ta haya pa traha cu ta importante y na beneficio di comunidad Arubano.
  6. Oportunidad pa participa activamente den e Service Club Circle K.
  7. Como cu UA ta un universidad chikito, hopi di e docentenan ta bin di afo. Es decir, cu e studiantenan ta ricibi nan informacion na nivel local y internacional.
  8. Gasto di matricula (collegegeld): Na Aruba ta paga solamente 1200 florin pa aña academico. Si nos compara esaki cu diferente otro universidad den nos region e collegegeld ta hopi abou.
  9. Debi cu UA tin diferente areglo y acuerdo cu otro universidad, e studiantenan cu ta paga solamente collegegeld di Aruba, por sigui un parti di nan estudio den exterior of haci nan stage na Curacao, Hulanda of Merca.

Asina por sigui menciona diferente beneficio pa studia na Universidad di Aruba. Den un siguiente articulo lo informa tocante e posibilidadnan cu Universidad di Aruba ta brinda su studiantenan pa den e di tres of cuater aña di nan estudio, haci parti di e estudio na un otro pais, pa nan experiencia e teorianan di nan estudio di otro perspectiva.

Academic Foundation Year

Universidad di Aruba ta ofrece un programa nobo cuminsando na luna di september proximo: Academic Foundation Year.

E programa aki ta special pa esnan cu a caba scol secundario (HAVO, VWO of MBO) y ta sirbi como preparacion (materia y orientacion) pa cuminsa un estudio superior na un instituto academico (HBO of Universidad). E Academic Foundation Year ta un “brug” entre un fase di enseñansa y e otro, e ta ofrece e alumno e oportunidad di un “tussenjaar” pa sondea su opcion y oportunidadnan pa cu su estudio y su futuro carera miho.

Durante e Open House lo duna mas informacion di e programa nobo aki.

Posibilidad pa Intercambio y Stage den exterior

Universidad di Aruba tin relacion estrecho cu diferente Universidad y Hogeschool na Hulanda y Merca y cu otro universidad acredita den region.

Recientemente Universidad di Aruba a cera un acuerdo cu University of South Carolina na Merca caminda e studiante lo por participa den un programa di intercambio, pagando e mesun suma di inscripcion cu tin na UA.

Universidad di Aruba tambe tin studiantenan cu ta haciendo nan stage na Hulanda bou di guia di Hogeschool Windesheim, University College Utrecht (UCU), Hanze University of Applied ScienceHogeschool Rotterdam (Social Work & Development), tur cu tin un laso di cooperacion estrecho cu Universidad di Aruba.

Esaki ta un muestra di e crecemento di Universidad di Aruba den e ultimo añanan. E convenionan cu Universidad di Aruba ta cera cu universidad reconoci mundialmente ta na bienestar di su studiantenan.

Open House

Universidad di Aruba ta invita tur hende pa bin cera conoci cu e ocho programanan di estudio cu UA ta ofrece. UA no ta solamente pa studiante cu a caba Colegio Arubano, ISA, EPI of Ibero, sino pa tur hende cu lo kier haci uzo di e oportunidad pa sigui un estudio na nivel di Bachelor of Master.

Mayornan cu tin yiu na scol secundario tambe ta bon bini pa haya sa mas tocante e estudio cu nan yiu kier haci, pa por yud’e scoge e pakete adecuado na scol secundario, loke ta facilit’e haya admision na un di e facultadnan.

Asisti na e Open House diahuebs dia 7 di april entre 6or di atardi y 9or di anochi.

[Programa Open House]

Mas informacion

Por haya tur informacion referente e diferente estudionan y rekisitonan di admision (toelatingseisen) riba e website di UA. Pa mas informacion tocante e bida di studiante y actividadnan lo por “like” UA su Facebook page [University of Aruba] y tambe por haya informacion riba #UAchieve.

Pa mas informacion of pregunta tocante registracion, rekisitonan y otro informacion general, por tuma contacto tambe cu UA su Office of Student Affairs (OSA) na telefon 5262255/56/57 of via di email osa@ua.aw. Tambe por pasa libremente na Office of Student Affairs ubica na e edificio di UA cu ta banda di Crown building riba Boulevard.

 


Info | Contact

Pa mas informacion por busca den e alfabet menu riba homepage: [U]niversity of Aruba] of por tuma contacto cu: University of Aruba.

 

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw