Arubahuis ta nombra diferente mentor nobo

September 17, 2018

Den Haag – Recientemente Arubahuis a conclui e proceso di solicitidud pa nombra diferente mentor nobo cu ta keda encarga cu e guia y sosten di nos studiantenan durante nan prome aña di estudio na Hulanda.

E potret ta cortesia di Cas di Aruba


Esaki ta a base di un desicion mutuo di Gabinete di Minister Plenipotenciario na Hulanda hunto cu Ministerio di Enseñansa na Aruba cu e meta pa restructura y reinforsa e guia y sosten di nos studiantenan.

Despues di un proceso largo un comision di solicitud a propone pa apunta 5 mentor nobo pa diferente regio cu hunto cu e mentornan existente lo tin e responsabilidad pa asisti e studiantenan cu a caba di yega Hulanda. Mester menciona cu Arubahuis a ricibi hopi reaccion riba e vacatura cu a keda publica na juli ultimo y a keda hopi contento cu e interes y motivacion di nos profesionalnan Arubano na Hulanda cu kier duna nan aporte na nos hobennan durante e fase nobo aki di nan bida.


Mentor nobo

E 5 mentornan nobo cu a keda nombra desde prome di september 2018 ta Arubanonan cu ta recidencia na Hulanda y den pasado nan mes tambe tabata studiante di Aruba na madre patria. Cada un por conta awe cu un trayectoria professional y experencia amplio den guia y sosten di hobennan den sea e ramo social of di enseñansa na Hulanda.

Groningen, Leeuwarden

Como mentor pa e regio di Groningen y Leeuwarden a keda nombra Donna van Heukelem-Kock. Sra. Van Heukelem-Kock actualmente ta docente na Hanze Hogeschool na Groningen.

Arnhem, Nijmegen, Wageningen

E regio di Arnhem, Nijmegen y Wageningen tambe conoce un mentor nobo den persona di Yuraima Henriquez-Rodulfo. Sra. Henriquez-Rodulfo tin un carera amplio como Maatschappelijk Werker y Wijkcoach den e ciudad di Arnhem.

Utrecht

Pa loke ta e regio di Utrecht e mentor nobo ta Omar Besaril. Sr. Besaril ta docente di Natuur- y Scheikunde cu varios aña di experencia den enseñansa laborando na un scholengemeenschap den e provincia di Utrecht.

Den Haag, Delft, Leiden

Finalmente e regio di Den Haag, Delft y Leiden, cu porcierto ta e regio di mas grandi, conoce awo dos mentor cu lo ta responsabel pa e guia y sosten di e studiantenan di promer aña. Ta trata aki di Solange Quandus, Onderwijskundige y cu experencia como studieadviseur den enseñansa superior na Hulanda, y Shahaira Brokke, kende ta un psychotherapeut cu specialisacion den “integrale therapie” y cu tin varios aña di experencia cu su propio praktijk na tanto Hulanda como na Aruba.


Mentor existente

A base di e nombracion di e mentornan nobo Arubahuis a haci un reparticion di e regionnan di e mentornan existente, mientras cu Arubahuis ta despidi den e periodo aki di Edy Ranada cu a fungi hopi aña como mentor pa diferente regio.

Brabant, Limburg

Swinda Venhorst-Thijssen ta keda como mentor di regio Brabant y Limburg.

Rotterdam, Zeeland

John Dirks ta keda por lo pronto como mentor di regio Rotterdam y Zeeland.

Amsterdam

Lourdes Bramble-Tromp ta asumi e responsabilidad como mentor pa regio Amsterdam.


Encuentro

Den e dianan aki ta tumando lugar encuentronan special pa studiantenan di e diferente regionan pa asina introduci e mentor nobo y tambe pa por despidi di e mentor saliente. Durante di e encuentronan tambe lo toca algun punto di atencion cu e hobennan y lo tin espacio pa atende nan preguntanan y intercambia di experencia.

Arubahuis ta sumamente contento cu a logra reinforsa e team di mentor pa asina por duna mas y miho guia na e studiantenan durante e fase crucial di nan bida y estudio na Hulanda. Ta mira cu e conocemento y experencia di e diferente mentornan nobo y existente ta complementa otro hopi bon y ta cubri e diferente areanan di atencion cu ta hustamente loke nos studiantenan tin mester. Arubahuis ta yama un caluroso bon bini na e mentornan nobo y ta desea nan hopi exito cu e tarea importante pa cu e guia y sosten di nos hobennan na Hulanda.


Info / Contact

Pa mas informacion por busca [S] Studia na Hulanda den e alfabet menu of por tuma contacto cu [Kabinet van de Gevolmachtigde Minister van Aruba – Arubahuis].

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw