Arubahuis a reuni cu mentor y POC

July 15, 2019

Den Haag  – Na Cas di Aruba (Arubahuis) a tuma luga dia 13 di juli ultimo un encuentro informal cu miembronan di e Plaatselijke Opvangcommissie (POC). E POC ta consisti di studiantenan Arubano cu ya caba ta studiando na Hulanda y cu conhuntamente cu e studiementor ta organisa e opvang pa e grupo di studiante cu ta biniendo Hulanda pa cuminsa cu nan estudio.

Coordinador di e departamento di Enseñansa di Cas di Aruba, James van der Linde, a yama e miembronan di e POC nan y e studiementornan bonbini y a bisa di ta contento cu hopi miembro di e POC a acepta e invitacion pa ta presente na Cas di Aruba. Un saludo special tabata tin pa e grupo di mentornan nobo cu e aña aki ta experencia nan prome aña di opvang.



James a informa cu e aña aki lo tin dos vuelo for di Aruba. E prome vuelo ta yega Hulanda diaranson 31 di juli, mientras cu un dia despues, diahuebs 1 di augustus e otro vuelo cu studiante ta yega Hulanda.

Minister Plenipotenciario suplente Eddy Paris a bisa di ta contento y orguyoso di e trabou importante cu e POC y e mentornan ta haci pa ricibi y duna guia na e studiantenan nobo.

Despues di esaki a haci un ronchi unda e mentornan y e miembronan di POC a introduci nan mes. Por a nota cu den e diferente POC nan tin basta studiante cu a yega aña pasa. Sigur un desaroyo positivo cu studiantenan cu tin un aña so na Hulanda ta mira e nesesidad pa brinda ayudo na e studiantenan nobo cu ta bin Hulanda.

Finalmente van der Linde a desea e POC y e mentornan hopi exito cu e ultimo preparacionnan pa ricibi nos studiantenan.


Potret: cortesia di Cas di Aruba


Info / Contact

Pa mas informacion busca [A] Arubalening Portal den e alfabet menu of tuma contacto cu:

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw