Aplicacion record pa studia na Merca y Canada

May 10, 2016

E meta pa diversifica opcionnan di estudio superior ta mustra di ta fructifero. Ministerio y Departamento di Enseñansa a tuma nota di un aumento substancial pa loke ta trata aplicacion pa studia na Merca y Canada.

Desde aña 2014 a inicia un plan pa cera acuerdonan cu Universidadnan na Merca y Canada pa asina ofrece nos studiantenan un alternativa clave pa esunnan cu ta dicidi pa studia pafo di Aruba. A cuminsa cu un acuerdo cu estado di South Carolina dunando nos studiantenan acceso na “in-state tuition” na University of South Carolina y Coastal Carolina y asina a sigui pa Florida International University por medio di un acuerdo cu e programa di LAC y tambe Florida State University cu nan 2+2 program na nan Panama City Campus.

Na aña 2015 a cera un acuerdo cu Seneca College na Toronto, Ontario, e prome instancia Canades, cu tambe a ofrece nos studiantenan un miho tarifa pa estudio.

“Nos esfuersonan pa sigura cu nos studiantenan por tin mas acceso y mas escogencia a resulta exitoso. Normalmente tin mas o menos 29 studiante pa aña cu ta skoge Merca of Canada. Pa e aña academico 2016/2017 nos a ricibi te cu awor 81 aplicacion pa estudio na diferente universidad nan na Merca/Canada. Awor ta e momento pa sondea mas posibilidad” Minister di Enseñansa Michelle Hooyboer-Winklaar a declara na inicio di un biahe pa reuni cu 6 diferente universidadnan na Merca y Canada.

Tin varios bentaha pa studiantenan cu ta scoge Merca of Canada, pero mas cu claro, Hulanda ta keda un opcion popular pa nos studiantenan. E hecho ta cu nos ta mira cu Hulanda no ta resulta exitoso pa tur studiante cu ta scoge esaki pa diferente factor entre otro distancia, e sistema di Enseñansa, cultura y idioma.

“E meta ta keda pa cera mas hopi acuerdo posibel cu Universidadnan y Colleges cu ta reconoci, cu ta brinda un calidad halto di estudio y cu ta economico pa nos studiantenan”, Minister Hooyboer-Winklaar a finalisa bisando.

 


Info / Contact

Pa mas informacion por busca den e alfabet menu riba homepage: [S] Studia na Merca of  [S] Studia na Canada of por tuma contacto cu  [M] Ministerio di Enseñansa.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw