Apertura di Siman di Enseñansa

October 24, 2018

Den cuadro di e Plan Nacional di Enseñansa “NOP 2030” a tuma luga e apertura oficial di e Siman di Enseñansa diamars dia 23 di october. Un siman pa informa, educa y dialoga riba enseñansa awo y den futuro.


Na final di aña 2017 Minister di Enseñansa sr. dr. Armando Lampe a encarga Departamento di Enseñansa Aruba (DEA) cu e desaroyo di e Plan Nacional pa Enseñansa nobo: NOP 2030. Meta di e NOP 2030 ta pa hunto cu tur stakeholder yega na un vision comun pa enseñansa na Aruba. E intencion ta pa e plan keda cla na december 2018.

E Siman di Enseñansa ta un momento pa reflexiona riba tur e cosnan cu nos, alumno, studiante, docente, maestro, cabesante di scol, profesional den enseñansa ta haci bon y conhuntamente pensa con nos lo bay sigui traha na un enseñansa di calidad y cu ta prepara nos pa futuro.

E topiconan ta enfoca riba calidad y innovacion den enseñansa.

E apertura oficial a tuma luga na Instituto Pedagogico Arubano (IPA) y a conta cu presencia di Minister di Enseñansa, miembronan di Parlamento, director di Departamento di Enseñansa Aruba y Inspector General entre otro.

Durante e apertura a hiba palabra Minister di Enseñansa sr. dr. Armando Lampe, director DEA sra. Anne-Marie Proveyer, como tambe voorzitter di e NOP-coördinatieteam sra. Sheila Maduro.

Sra. drs. Marylin Richardson, director di Insitituto Pedagogico Arubano a duna un charla riba e topico di calidad den enseñansa superior, mientras cu sr. Ulrich Hermans di e Government Innovation Lab “Futura” a papia tocante innovacion.

E programa a conta tambe cu presentacion di Fundacion Muchila Creativo y studiantenan di bachelor Papiamento di IPA.

Esnan presente por a participa na un “live digital poll” caminda a haci e preguntanan: (1) Enseñansa di calidad: Kico ta e prome palabra cu ta drenta bo mente? (2) Kico ta e puntonan di atencion pa logra un enseñansa di calidad? (3) Kico bo lo kier wak den e vision di enseñansa?

Na final di e anochi e invitadonan por a admira un exposicion di best practices riba “activerende werkvormen”, “blended learning in de nascholing”, “IPA International Programs” y “Programa Innovativo MyS” entre otro.


Actividadnan di e Siman di Enseñansa

E Siman di Enseñansa a cuminsa cu diferente ronda di consulta cu cabesante di tur e scolnan di enseñansa primario, special, openbare avondleergangen (OAA), EPB, EPI, MAVO y HAVO y VWO.

Durante e rondanan di consulta e cabesantenan a intercambia di pensamento riba e diferente areanan di e sistema di enseñansa na Aruba. E participantenan a haya e oportunidad pa vocifera nan puntonan di atencion pa enseñansa y e elementonan cu nan lo kier wak bek den e vision pa Enseñansa 2030.

E Siman di Enseñansa ta sigui cu un ronda di discusion na Universidad di Aruba cu e topico “Calidad di Enseñansa 2030”. Esaki ta conta cu participacion di representantenan di Dienst Inspectie van het Onderwijs, Dienst Publieke Scholen (DPS), Stichting Protestants Christelijk Onderwijs Aruba (SPCOA), Stichting Katholiek Onderwijs Aruba (SKOA), Scol Dununman, Colegio Arubano, EPB, EPI, IPA y UA. Na Colegio EPI lo tuma luga un encuentro cu lo enfoca riba e topico “Education and the Future of Work”.


Acitividad pa comunidad “The Future of Education”

Ministerio di Enseñansa conhuntamente cu Departamento di Enseñansa ta invita pueblo di Aruba pa bin mira y disfruta di nos talentonan local den mundo di enseñansa y mira con innovacion ta
tumando luga na Aruba.

Durante e actividad aki lo presenta entre otro un klas virtual caminda publico lo por experencia un forma nobo di siña, como tambe e Mobile Makerspace (bus di ciencia) lo ta presente.

“The Future of Education” lo conta cu un programa den cua hubentud lo haya oportunidad pa vocifera nan opinion y ideanan, como tambe pa presenta nan arte den forma di baile, canto y poesia. Alumnonan di EPB y EPI lo ta presente pa demostra nan arte culinario. Lo tin Dino Jump, cotton candy y popcorn pa nos muchanan.


“The Future of Education” lo tuma luga diasabra dia 27 di october
na Plaza Padu for di 6 or di atardi pa 10 or di anochi.



Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw