Anochi di infomacion na Colegio EPI

March 7, 2016

Colegio EPI ta organisa su anochi di informacion diabierna dia 11 di maart proximo caminda lo duna informacion valioso na tur studiante di scolnan secundario.

Meta principal di e anochi di informacion ta pa informa studiantenan di scolnan secundario EPB, MAVO y HAVO tocante e opleidingnan cu tin na Colegio EPI y kico ta e rekisitonan di admission.

Ta importante pa tene na cuenta cu pa wordo acepta pa un opleiding mester cumpli cu e profiel cu e opleiding ta exigi.

E anochi di informacion lo tuma lugar den e Auditorium di Colegio EPI, caminda lo tin varios booth di informacion di e opleidingnan. Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa scoge un estudio.

Ora un studiante caba Colegio EPI e ta un profesional riba nivel intermedio (MBO). Hopi studiante ta dicidi cu nan kier sigui studia despues riba nivel HBO. Durante e anochi aki e studiante por haya mas informacion tocante esaki y tambe lo tin oportunidad di papia cu studiantenan actual di Colegio EPI y nan experencia na scol.

Pa e studiante cu ainda no ta sigur den cua ramo e kier sigui studia den futuro, Colegio EPI ta encurash’e pa pasa bishita tur e boothnan presente pa asina e por haya informacion di tur opcion cu Colegio EPI ta brinda.

E anochi di informacion lo tuma luga diabierna 11 di maart proximo, for di 5:30 di atardi pa 8:00 di anochi den e Auditorium di Colegio EPI.

Colegio EPI ta informa cu gate 9 (patras di Hospitalidad & Turismo) y gate 10 (entrada di Ciencia & Tecnologia) lo ta habri. Pa mas informacion di e anochi di informacion, un mapa di e campus y Colegio EPI en general por bishita e website na www.epiaruba.com.

 


Info / Contact

Pa mas informacion por busca den e alfabet menu riba homepage: [E]ducacion Profesional Intermedio (EPI) of por tuma contacto cu Colegio EPI.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw