Amsterdam a yama bon bini na studiantenan di Aruba

August 19, 2016

Den stadhuis di Amsterdam a tuma luga un recepcion pa e studiantenan di Curaçao, Boneiro, St. Maarten, St. Eustatius y Aruba. Den e sala di reunion di e municipio di Amsterdam lider di fraccion di PvdAMarjolein Moorman a yama tur e studiantenan bon bini.

Potret Edwin van Eis

 

E recepcion a conta cu presencia di Minister PlenipotenciarioAlfonso BoekhoudtDirectora di Gabinete di Aruba, Shandra JohnFuncionario di Departamento di Enseñansa di Gabinete di ArubaIvonne Navas y e mentornan pa Amsterdam Edy Ranada Lourdes Bramble-Tromp.

Den su discurso na e studiantenan sra. Moorman a menciona e hecho cu e studiantenan a tuma un paso grandi di sali for di nan isla pa bin biba y studia na Amsterdam. E politico a bisa e grupo di studiante cu nan mester trata na haci Amsterdam nan segundo hogar. “Amsterdam ta conoci pa ta un ciudad bunita y hopi diverso pa loke ta trata e poblacion di 840 mil persona cu ta biba na Amsterdam, di cua un 11 mil ta procedente di e parti di Reino Caribense.”

Moorman a menciona den su duscurso e atletanan Churandy Martina Liemarvin Bonevacia, ambos di Curaçao y cu nan prestacion ta un ehempel di perseverancia. “Despues cu Churandy Martina a keda descualifica na e Campeonato Mundial luna pasa na Amsterdam, ela mustra na un momento asina bo mester sigi bringa pa surpasa bo mes. Esaki tambe mester ta un ehempel pa boso. No “give up”, tuma initiativa, haci hopi pregunta y no sinta cu preguntanan, pero busca ayudo cerca boso mentor of funcionarionan na boso Hogeschool of Universidad.” asina Marjolein Moorman a bisa e studiantenan.

Minister Plenipotenciario Alfonso Boekhoudt a conta di su mesun experencia como studiante na Hulanda. E mandatario a haci un apelacion riba e studiantenan pa amplia nan circulo di amigo cu studiantenan Hulandes Europeo.

Directora di Gabinete di Aruba Shandra John a enfatisa na e studiantenan cu Gabinete di Aruba tey pa asisti nan, pero nan mentor ta keda e prome punto di contacto pa nan.

E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante.

Esaki ta di seis aña cu municipio di Amsterdam ta organisa e recepcion aki pa e grupo nobo di studiantenan di e parti Caribense di Reino Hulandes.

 


Info | Contact

Pa mas informacion por busca den e alfabet menu riba homepage: [Studia na Hulanda] of por tuma contacto cu: [Kabinet van de Gevolmachtigde Minister van Aruba – Arubahuis]

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw