Academic Foundation Year

March 11, 2016

Universidad di Aruba ta ofrece un Academic Foundation Year na esnan cu a caba scol secundario (HAVO, VWO of MBO) como preparacion (materia y orientacion) pa cuminsa un estudio superior na un instituto academico (HBO of Universidad).

Recientemente a tuma luga ceremonia oficial di firmamento pa financiamento di e “Academic Foundation Year”, den cual Universidad di Aruba ta ricibi fondonan di OCW di Hulanda pa medio di Fondo Desaroyo Aruba pa diseña e programa, y fondonan di Ministerio di Enseñansa pa opera e programa durante e aña academico cuminsando September proximo.

E Academic Foundation Year ta un “brug” entre un fase di enseñansa y e otro, e ta ofrece e alumno e oportunidad di un “tussenjaar” pa sondea su opcion y oportunidadnan pa cu su estudio y su futuro carera miho.

E tin beneficio pa e universidad tambe, segun Eric Mijts, den e sentido cu e ta yuda Universidad sirbi e comunidad di Aruba miho. E ta un servicio pa studiantenan cu ta provee e instrumentonan pa fortifica nan base y prepara nan miho pa un estudio academico na Aruba of den exterior, Mijts a agrega.

E studiantenan lo traha den gruponan relativamente chikito, entre 20 pa 40 persona y e meta ta pa crea un medio ambiente balansa, den cual ta siña nan sostene otro, traha “peer to peer” y siña traha cu studiantenan cu ta bishitando Universidad di Aruba for di otro universidadnan di exterior.

Diferente profesor di otro Universidadnan di exterior lo ofrece lecturanan na Aruba, tur pa por guia e studiantenan miho den e rumbo desea den nan estudio.

E programa ta yuda universidad tambe den crea un base di conocemento mas amplio, diversificando den diferente area cu no ta wordo ofreci ainda actualmente, Mijts a conclui bisando.

E fondonan traspasa for di FDA pa Universidad di Aruba lo wordo uza pa crea e programa nobo y Ministerio di Enseñansa a inclui e financiamento pa maneha e programa pa futuro den e presupuesto di Gobierno di Aruba mes.

 


Info | Contact

Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw