Trabou ta continua den cuadro di revision di maneho di Enseñansa Secundario General
Den cuadro di nos Plan Strategico Nacional di Enseñansa PEN 2030 ta trahando riba revision di e maneho pa Enseñansa Secundario.
Dia 5 di juni 2025, a tuma luga un “werksessie” di Algemeen Voortgezet Onderwijs (AVO). E sesion tabatin como meta pa brinda e cabesantenan di e scolnan di AVO, EPI y EPB e oportunidad pa duna nan input y feedback riba e accion proponi pa e maneho strategico nobo pa Enseñansa Secundario General.
Durante e ultimo lunanan e grupo aki a participa na diferente ronda di consulta y “focus group sessions” pa asina aporta na e proceso. Awor den e parti final di e proceso, prome cu e documento strategico keda entrega na Minister di Enseñansa, ta importante pa nan mira e resultado y duna nan opinion. E manera participativo aki di traha maneho nobo y/of cambionan den enseñansa ta cuadra cu PEN 2030.
E sesion tabata den forma di carousel, unda cu den grupo di 2 of 3 persona por a analisa e accionnan proponi cu tin como meta pa “bridge a gap” pa asina yega na metanan strategico stipula riba e situacion actual di enseñansa secundario.
E temanan cu a concentra riba nan ta entre otro structura di enseñansa, un ambiente sigur y cu ta stimula e studiantenan pa siña y calidad di enseñansa.
E cabesantenan di scol tabatin e oportunidad pa duna nan aporte y a expresa nan opinion, esaki ta un forma di traha riba comunicacion y informacion pa asina crea e sosten necesario pa ora implementa e maneho. E implementacion lo mester pasa cu sosten di tur stakeholder, pa es motibo e actividadnan aki ta aporta na un forma positivo na e proceso.
Info / Contact
Pa mas informacion por busca tambe den e alfabet menu riba nos pagina principal:
- [A] AVO 3.0
- [P] PEN2030
