Minister di Enseñansa a firma acuerdo cu ROC Mondriaan

30/01/2026

Aruba ta drenta oficialmente un etapa nobo pa educacion profesional (Beroepsonderwijs), ora cu Minister di Enseñansa, mr. Gerlien Croes, a firma un acuerdo di colaboracion cu ROC Mondriaan di Hulanda.

E firma aki ta marca un paso importante den e fortalecemento continuo di educacion profesional y educacion practico continuo na Aruba.

Den e acuerdo aki, Colegio EPI, Stichting Educacion Profesional Basico (SEPB/EPB) y OABA ta wordo reconoci oficialmente como partnernan di colaboracion. Tur e institutonan ta comparti un pasion pa educacion di calidad y atractivo, y e colaboracion aki ta conecta Aruba y Hulanda riba un fundeshi solido di intercambio di conocemento, experencia y innovacion.

E institutonan

Colegio EPI ta funciona como un instituto di formacion pa educacion profesional medio (MBO) na Aruba, cu cuatro unidad y 19 programa di estudio, reparti entre BOL y BBL nivel 3 y 4, ademas di training y formacion den marco di Leven Lang Ontwikkelen (LLO).

SEPB ta enfoca riba educacion secundario y MBO nivel 2, mientras cu OABA ta ofrece educacion pa adulto y enseñansa MBO nivel 1 te cu 4, tambe ta inclui training y formacion continuo (LLO).

ROC Mondriaan, cu ta ofrece alrededor di 240 programanan di MBO reparti entre nan 24 scolnan na Hulanda, y cu amplio experiencia den educacion pa adulto, ta traha hunto cu e partnernan na Aruba pa brinda e miho educacion posibel na nan alumno y studiantenan.

A traves di colaboracion di contenido y organisativo, e partnernan ta siña di otro y ta fortalece nan sistema educativo.

Colaboracion

Pa e proximo añanan, e colaboracion ta concentra riba:

Revision y progreso di e structura di cualificacion, incluyendo examinacion y cuido di calidad;
Flexibilisacion di educacion y fortalecemento di Leven Lang Ontwikkelen (LLO);
Intercambio y bishita di trabou entre docentenan y studiantenan;
Sosten pa posibel aplicacion pa Regionaal Investeringsfonds (RIF);
Temanan actual den educacion manera AI, desaroyo di team y igualdad di oportunidad.

E acuerdo ta stipula e principionan general di colaboracion, cu acuerdo specifico pa diferente scolnan y gruponan escolar lo detaya e areglonan concreto.

E acuerdo ta drenta na vigor desde 1 di januari 2026 y lo ta valido te cu 1 di januari 2030, cu e intencion pa sigui desaroya y fortalece e colaboracion, y cu e deseo, pa prolonga of renoba e acuerdo.

Cu e firmamento di e acuerdo aki, Gobierno di Aruba y su partnernan educativo ta confirma nan compromiso pa sigui inverti den educacion fuerte, moderno y conecta cu practica, cu e obhetivo final pa crea mas y miho oportunidadnan pa tur alumno y studiante na Aruba.

Fuente: Facebook / Instagram / Website