Fundacion ta ricibi asistencia pa medio di Onderwijsfonds
Fundacion Ban Uni Man Pa Cria Nos Muchanan, un fundacion cu pa hopi aña ta percura pa desayuno na scol pa muchanan den necesidad, a ricibi asistencia pa medio di Onderwijsfonds 2017.
Fundacion Ban Uni Man Pa Cria Nos Muchanan ta duna muchanan di menos recurso un desayuno cu ta consisti di un sandwich y algo di bebe tur dia na scol.
 |
A lanta e fundacion na aña 2001 y tin pues 16 aña di existencia. Na momento cu nan a cuminsa e fundacion tabata yuda 138 mucha. Na cierto momento e fundacion tabata percura pa 800 mucha haya e desayuno. Pa motibo cu e gastonan a subi y no tabatin suficiente sponsor, a yega un momento cu e reservanan a cuminsa baha y nan mester a baha e cantidad di 800 pa 600 mucha. Actualmente e fundacion tin 600 mucha inscribi.
Den pasado, tempo cu e actual Minister di Enseñansa (Hooyboer-Winklaar) tabatin e cartera di Asuntonan Social, ya caba tabata existi un contacto estrecho cu e fundacion pa asina monitorea nan trabou y situacion.
Na momento cu e minister a tuma encargo di e cartera di enseñansa el a busca un forma pa contribui cu e fundacion aki cu ta haci un trabou cu un meta social pero tambe di enseñansa. Si e muchanan no por concentra pa motibo cu nan no tin e nutricion cu nan mester, esey sigur lo tin efecto riba e resultadonan academico.
Na luna di juni ultimo Onderwijsfonds 2017 a wordo aproba den Parlamento di Aruba y asina ey a yega na e fondonan necesario pa brinda ayudo na e fundacion. A brinda nan un suma di proyecto cual no ta un subsidio anual.
 |
Recientemente como Minister di Enseñansa, Michelle Hooyboer-Winklaar a ricibi bishita John Fun, presidentedi Fundacion Ban Uni Man Pa Cria Nos Muchanan.
Pa e fundacion tabata un placer grandi pa ricibi e yamada di minister pa nan pasa cerca dje. E fundacion a ricibi e bon noticia cu for di e cartera di enseñansa el a logra algo y por yuda nan. “Nos ta hopi contento, hopi entusiasma y hopi agradecido cu e ayudo ey”, asina John Fun a duna di conoce.
“Nos ta hopi contento di a yega y finalisa e suma di Afl 100,000 pa e fundacion importante ki”, asina Minister Hooyboer-Winklaar a expresa. Esaki lo por yuda kita un lista di espera, si tin cualkier aumento den e cantidad di muchanan. Esey ta algo cu e mandatario por yuda y di otro banda planea un tiki mas delanta, mirando cu nan ta crea un buffer den nan presupuesto. E otro efecto di e proyecto aki ta e por yuda e fundacion explora expansion di e tipo di alimentacion duna den futuro. “Nos ta sumamente contento cu e paso aki a tuma luga, y mi ta convenci cu esaki lo ta un inversion valioso y necesario pa contribui na comunidad henter”.
Cu e fondonan priminti na e fundacion, nan por yuda 30 mucha pa 3 aña largo. “Mi ta expresa asina, pasobra nos por yuda 100 mucha pa 1 aña largo”, el a splica. Pero pa duna e ayudo na un mucha pa continuidad e fundacion ta prefera parti’e over un par di aña.
Fundacion Ban Uni Man Pa Cria Nos Muchanan ta yuda muchanan na 52 scol rond Aruba, den tur bario.