Overgangsnormen DPS

17/07/2026

Minister di Educacion a oficialmente aproba e normanan nobo di bay over (overgangsnormen) destina pa e scolnan basico di Dienst Publieke Scholen (DPS).

Ministerio di Relacionnan den Reino, Enseñansa, Hubentud, Innovacion y Deporte ta participa oficialmente cu a aproba e normanan nobo di bay over (overgangsnormen) cu enfasis riba inclusion y evaluacion na midi. Cu e decision aki, Ministerio ta stipula un cuadro reglamentario y pedagogico pa asina tur scol por evalua den forma uniforma, husto y transparente si e alumno ta bay over.

E meta principal di e normanan aki ta pa duna un structura, teniendo cuenta cu e realidad cu cada mucha ta unico. Pa e motibo aki, e maneho nobo ta duna un prioridad halto na e aplicacion di evaluacion na midi pa asina garantisa oportunidad igual pa tur alumno.

Evaluacion na midi pa alumno cu limitacion intelectual di Siñamento y Desaroyo

Sosteniendo e principio cu educacion mester wordo ahusta na e situacion unico di cada alumno, Ministerio ta introduci hunto cu Directiva di Scolnan Publico (DPS) un enfoke fiho riba consideracion cu e alumno cu tin un limitacion intelectual den desaroyo of siñamento.

E maneho ta encera:

Cumplimento di procedura di cuido: Pa tur alumno cu tin un limitacion intelectual pa siñamento of desaroyo oficialmente determina manera entre otro TOS (limitacion di desaroyo di lenguahe), dyslexia, dyscalculia, ASS (autismo) of ADHD: mester cumpli fielmente y di forma estricto cu e proceduranan di cuido y e medidanan compensatorio stipula.
Flexibilidad riba rigides: E normanan di bay over nunca por wordo aplica na un manera rigido si esaki ta causa un daño innecesario na e desaroyo educativo di un alumno cu ta bin na remarca pa un acercamento specifico. E oportunidadnan di desaroyo y e evaluacion na midi mester ta e guia principal pa e alumnonan aki.
Decision conhunto y debidamente fundamental: Cualkier decision structural tocante laga un alumno bay over of keda sinta (doubleren) dentro di e grupo di vulnerabilidad aki, mester wordo explicitamente fundamenta y argumenta. Esaki mester tuma luga den un dialogo husto y cooperacion conhunto entre e maestro, e guia interno (intern begeleider), e team di cuido (zorgteam), y e mayornan of representante legal di e mucha.

Implementacion y Monitoreo Eficiente

Pa e implementacion ta efectivo mayor tin un rol importante den informa scol debidamente na momento cu e yiu tin un situacion den desaroyo cu ta rekeri un acercamento particular.

E directiva di e scolnan publico (DPS) lo percura pa un implementacion efectivo y e monitoreo continuo di e normanan incluso e reglanan di consideracion cu e casonan specifico di alumno. Minister di Educacion, cu ta e autoridad competente di e scolnan publico, tin e pleno confiansa cu lo brinda e marco y e sosten necesario na tur lider di scol, sigurando asina decision husto y inclusivo den e sistema escolar publico.

Minister di educacion, sra. mr. Gerlien Croes, ta reafirma su compromiso cu e calidad di educacion y specialmente cu e igualdad di oportunidad pa tur nos muchanan na Aruba, gradiciendo e liderazgo y esfuerso continuo di e personal educativo pa logra e meta noble aki.