Educacion profesional cu dos acuerdo strategico importante

09/03/2026

Dia 3 di maart 2026 Minister di Enseñansa Gerlien Croes a firma oficialmente dos acuerdo di gran importancia pa futuro di educacion profesional na Aruba.

Cu e firma aki, Ministerio di Educacion, hunto cu e partnernan local y internacional, ta confirma su compromiso pa fortifica calidad, innovacion y conexion cu mercado laboral.

Fortalece colaboracion local den MBO

E prome acuerdo ta un colaboracion entre Dienst Publieke Scholen (DPS) representando EPI y OABA y Stichting Educacion Profesional Basico (SEPB). E meta principal di e colaboracion ta modernisa y fortifica eduacion profesional (MBO) riba Aruba durante e proximo dos añanan.

E acuerdo ta enfoca riba:

Innovacion den metodo di enseñansa;
Profesionalisacion di docentenan;
Desaroyo di un linea di aprendisaje continuo for di scol te na mercado laboral of educacion pa adulto;
Flexibilisacion di trayecto di estudio;
Un miho conexion entre enseñansa y necesidadnan di mercado laboral.

E colaboracion aki lo contribui na un sistema di enseñansa cu ta mas adapta, relevante y prepara hoben- y adultonan miho pa futuro profesional.

Continuacion di alianza internacional cu ROC Mondriaan

Ademas, a wordo renoba y formalisa e alianza strategico entre ROC Mondriaan (Hulanda) y e institucionnan na Aruba. E colaboracion aki, cu lo dura te 2030, ta basa riba igualdad y un pasion comparti pa ofrece e mihor enseñansa na tur studiantenan — tanto na Hulanda como na Aruba.

E enfoke pa e añanan binidero ta inclui:

Innovacion y calidad den enseñansa;
Flexibilisacion di enseñansa y concepto di “Leven Lang Ontwikkelen”;
Intercambio di docente y studiante;
Temanan actual manera AI, desaroyo di team y igualdad di oportunidad.

Invercion den talento y futuro di Aruba

Cu e dos acuerdonan aki, Aruba ta pone un paso firme den direccion di un sistema di educacion profesional moderno, dinamico y conecta cu e mundo real. E colaboracion local y internacional ta crea oportunidad nobo pa studiantenan, docentenan y pa desaroyo economico di nos pais.

Ministerio di Educacion ta expresa su gratitud na tur partnernan involucra y ta reafirma su compromiso pa sigui traha hunto riba un vision comparti: un Aruba unda talento ta desaroya, innovacion ta florece y enseñansa ta sirbi como base solido pa progreso sostenibel.

Fuente: Facebook / Instagram / Website