Kerndoelen presenta na docentenan di kleuterschool
Mas di 150 docente di scolnan preparatorio (kleuter), a participa na e prome, di un serie di presentacion y tayer relaciona cu introduccion di “Kerndoelen” (meta nucleo) pa enseñansa primario.
 |
E facilitadornan a presenta e documento cu e kerndoelen den un sesion plenario, sigui pa diferente tayer. Tur docente di tur scol preparatorio y primario (basisscholen) di Aruba den e siguiente dianan lo atende e presentacion aki.
E kerndoelen ta algo cu a boga p’e den enseñansa pa bastante tempo; a traha duro riba su realisacion y hustamente awo, den Luna di Enseñansa, a logra keda cla cu e parti di “Rekenen / Wiskunde”, esta matematica, pa e wordo presenta y, consecuentemente implementa.
 |
Berthson Boekhoudt, kende ta traha na Instituto Pedagogico Arubano (IPA) como docente, a splica cu e kerndoelen ta indica tur loke e mucha mester sa di rekenen/wiskunde na final di zesde klas. E documento ta contene un liña cla di e contenido pa sigui for di cuminsamento di scol preparatorio (kleuter) te na final di scol basico.
Kerndoelen Werkdocument
E “werkdocument” ta un instrumento nobo cu ta pone tur scol basico riba e mesun liña pa cu e rekisitonan di topico y conocemento minimo cu e hoben mester a wordo ofreci den cada klas pa cu su preparacion pa su ingreso na un scol secundario. E ta un documento oficial cu tur klas y scol mester cumpli cune y ta pone tur scol na e mesun nivel minimo pa cu e materialnan y topiconan cu ta wordo ofreci na e alumno.
Scolnan tin un liña cu nan ta siguiendo caba, Berthson Boekhoudt a comenta, e docentenan tin cierto rekisitonan cu ta estableci na nan scol, pero esaki ta un documento cu oficialmente ta pone nan tur riba e mesun liña.
 |
“Kerndoelen ta un guia pa un miho fundeshi pa nos muchanan”
Algun luna pasa Joamy Henriques a wordo acerca pa Jerrelyn Kannegieter-Wever (Bureau Minister) pa participa na e proceso di establecimento y implementacion di kerndoelen y e kerndoelenwerkdocument pa scolnan preparatorio y scolnan basico.
Pa e ultimo shete lunanan Henriques tabata dedica na e proyecto aki y ta expresa cu esaki ta algo cu docentenan ta pidi p’e, e guia – specialmente pa scolnan preparatorio y klasnan 1, 2 y 3, con pa forma e muchanan miho pa nan sali miho for di klas 6 y pa nan drenta scol secundario bon prepara.
Joamy Henriques, kende di profesion ta interne begeleider (IB’er), a bisa cu e bunita di e fruto cu nan tin awe pa traha cune, esta e kerndoelenwerkdocument aki ta cu e ta contene e “tussendoelen”, cu ta indica na cada station, esta kleuter 1, kleuter 2, klas 1, klas 2, etc. te na klas 6 kico nan mester traha riba dje riba tereno di matematica y ki parti nan tin cu yega pa ora e alumnonan yega klas 6 e totalidad di metanan pa scol primario a wordo completa.
Esaki ta un guia di kico ta e minimo cu e muchanan mester tin na conocemento di rekenen/wiskunde pa tin un miho fundeshi pa drenta scol secundario, el a conclui bisando.
Riba diaranson e proceso di introduccion di e kerndoelen y e documento di trabou a cuminsa cu un sesion plenario sigui pa diferente tayer. E prome grupo cu a participa na e sesion aki ta e maestronan di scolnan preparatorio (kleuter). E sesionnan di introduccion ta provee un plataforma habri cu e oportunidad pa intercambio di idea, tips y conseho entre e docentenan y esnan encarga cu e establecimento di kerndoelen pa enseñansa preparatorio y primario na Aruba.
Download
Aki por download e documento(nan):
> Documento & Publicacion > K > Kerndoelen
Info / Contact
Pa mas informacion por busca [K] Kerndoelen den e alfabet menu riba homepage y/of por tuma contacto cu DEA | Seccion Curriculum Ontwikkeling.
Scroll To Top
