Tocante
Seccion Desaroyo di Curiculo
Seccion Desaroyo di Curiculo di Departamento di Enseñansa ta encarga cu desaroyo y revision di programa di enseñansa pa Aruba. Cu programa di enseñansa pa Aruba ta referi na material educativo, pero tambe na e metanan nucleo of e terminonan final pa tur tipo di enseñansa y cu tin un base legal. Unda cu ta necesario, ta desaroya material educativo cu ta tene cuenta cu nos contexto specifico y cu e metanan nucleo of e terminonan final.
A lanta e seccion na 1986 primeramente cu e meta pa percura pa material cu ta tene cuenta cu e mucha cu ta biba na Aruba. Cu tempo e seccion a crece y a percura tambe pa e metanan nucleo pa enseñansa primario y pa e terminonan final pa enseñansa avansa y profesional den luz di innovacion den enseñansa. E seccion a desaroya programa y material educativo pa enseñansa basico, Enseñansa Profesional Intermedio (EPB), enseñansa secundario general (mavo, havo y vwo) y durante e ultimo añanan pa e proyecto Scol Multilingual. A desaroya diferente buki di tarea cu ta forma parti di e metodonan pa e proyecto Scol Multilingual. E bukinan di tarea (solamente di e metodonanan pa scol basico) ta na benta y por bestel esakinan na pentaaruba@yahoo.com
Ademas e seccion ta brinda sosten na directiva di scol/na scol den scogemento di un metodo adecua como tambe den screening di material cu maestro/docente a desaroya. Seccion Desaroyo di Curiculo por asisti e interesadonan den enseñansa cu diferente tayer riba e tereno di skirbimento di storia y texto, traduccion y adaptacion di texto of metodo existente. Por menciona tambe sosten riba e tereno di programacion, trahamento di ‘Programmering van Leerstof en Toetsing’ (P.L.T.’s).
Pa por realisa e tareanan menciona, e seccion ta traha den cooperacion estrecho cu directiva di scol, scol, otro departamentonan di gobierno como tambe cu instancianan educativo internacional.
Proyecto Idioma den Enseñansa
Proyecto Idioma den Enseñansa ta traha riba standarisacion y cultivacion di Papiamento pa sostene introduccion di Papiamento como idioma di instruccion y como materia den enseñansa. Standarisacion, esta fihamento di regla pa Papiamento, ta importante pa un miho comunicacion y uniformidad. Unabes cu a fiha e reglanan, ta importante tambe pa aplica nan. Pa e motibo ey Proyecto Idioma den Enseñansa a publica material di referencia pa ortografia (buki y spelling checker) y gramatica. Esaki a sosode pa gran parti cu financiamento di FDA.
E gruponan meta di e material di referencia ta entre otro enseñansa, departamento di gobierno, agencia di publicidad y prensa.
Pa conscientisa publico en general y pa henter comunidad tambe por aplica e reglanan di Papiamento, a tene un campaña di informacion y di conscientisacion den e medionan di comunicacion. Den cuadro di e campaña a publica un documentario tocante Papiamento y a distribui varios otro material di promocion.
E webpage aki ta contene un lista amplio di e edicionnan di tanto Seccion Desaroyo di Curiculo como di Proyecto Idioma den Enseñansa. E webpage ta un refleho di e esfuersonan cu a desplega den transcurso di e ultimo tres decadanan. Ta e deseo pa por sigui conta cu sosten di tur esnan concerni cu produccion di material na bienestar di nos enseñansa.
Scroll To Top