Buscando un topico?
Mustra tur topico

Veilige School

Protocol

Dia 24 di november 2011 Stichting Katholiek Onderwijs Aruba (SKOA), Cuerpo Policial, Ministerio Publico, Fundacion Comunidad y Criminalidad (SMC), Fundacion Telefon pa Hubentud y Departamento di Enseñansa Aruba, a firma e protocol "Traha na un Scol Safe".


E organisacionnan menciona ta traha hunto pa mehora e siguridad fisico y emocional di alumno y maestronan di scol na Aruba. Pa logra e meta lo introduci e metodo "Traha na un Scol Safe" y su manual den e añanan nos dilanti.

Punto di salida di e acuerdo unico entre e campo di enseñansa y husticia ta cu scol mester ta un hogar safe, tanto riba tereno fisico como riba tereno emocional pa tur alumno y docente como tambe pa e mayornan, cabesante y demas personal di scol.

Tur hende mester sinti nan mes na cas na scol. E mester ta un ambiente cu ta brinda siguridad y cu ta stimula e desaroyo di tur hoben y na unda tin oido pa nan problema y preocupacion.

Pa logra esaki instancianan y organisacionnan den enseñansa y husticia a cera cabes y a haci un serie di palabracionnan cu ta encera:

  • e calidad di enseñansa
  • e maneho di cuido y siguridad na scolnan
  • e cooperacion entre scolnan y organisacionnan cu por duna sosten na e scolnan
  • e informacion pa alumnonan y nan mayornan
  • e sosten di Departamento di Enseñansa Aruba

 

 

E maneho di siguridad na scol

A keda palabra cu di awor pa dilanti lo hiba un maneho di siguridad cu lo basa su mes riba e metodo "Traha na un Scol Safe".

E publicacion a wordo desaroya pa Fundacion Comunidad y Criminalidad hunto cu Telefon pa Hubentud, conforme e Tratado Internacional di Derecho di Mucha. E maneho di siguridad ta encera (entre otro) cu e directivanan di scol lo promove siguridad y cuido na scol y lo bin cu reglanan special pa bringa comportacion indesea y posiblemente castigabel. E reglanan lo encera tambe e prevencion cu cada scol por hiba. Un ehempel ta e control di locker, tas y paña. Pero tambe lesnan di comunicacion y negocia entre docente y alumno (social skills) ta forma parti di e prevencion aki.

SKOA ta e prome directiva cu ta firma e protocol y di awor pa dilanti, SKOA y Polis lo traha mucho mas hunto. Pa cuminsa tur scol lo wordo adopta pa un bario-regisseur di Cuerpo Policial. Cada bario-regisseur lo haya un scol na su encargo, cu cual e lo coopera activamente. E alumno y docentenan lo topa ‘nan’ bario-regisseur frecuentemente.

Banda di esey SKOA lo traha activamente hunto cu Polis ora di mantene ley y ordo na scol. Pa haci e cooperacion posibel, Cuerpo Policial lo yega na acuerdonan cu e scolnan tocante surveillance riba tereno di scol, detencion di sospechoso y control preventivo riba arma y droga.

SKOA y Cuerpo Policial lo topa regularmente pa papia tocante e factornan di riesgo y prevencion na scol y di incidente y casonan cu a sosode den e periodo ey. E bario-regisseur lo fungi como personanan di contacto pa Polis.

E scolnan a compromete nan mes mediante e protocol, pa ora tin sospecho cu a comete un acto castigabel, cu ta raporta esaki inmediatamente na Polis. Cuerpo Policial y Ministerio Publico a compromete nan mes pa duna prioridad na e meldingnan aki y traha lihe riba e denuncianan.

 

Pakico un scol sigur?

Tin diferente motibo pakico scolnan na Aruba ta cumpli cu e aspectonan di un ‘scol sigur'. Scolnan ta hunga un papel hopi importante den desaroyo di mucha y hoben. Cu su tarea pedagogico y educativo scol ta aporta directamente na institucion y desaroyo di comunidad. Inverti den formacion y educacion di hoben ta inverti den desaroyo duradero. Pa por siña y traha bon y contento, e mucha y e maestro mester sinti nan mes fisicamente y emocionalmente sigur. Lamentablemente esaki no ta tur ora e caso. Sa tin caso den cua ta surpasa e liña di comportacion, tanto di parti di adultonan den y rond di scol como di e alumnonan.


Den casonan similar mester actua planifica, cu huicio, ta riba e mesun  liña y consecuente, tanto di parti di adultonan den y rond di scol como di e alumnonan. Esaki ta exigi un maneho cu mira riba un scol sigur.

 

Riesgonan den scol

Si nos kier of no, tur hende sa tuma riesgo, conscientemente of inconscientemente.

  • Tin biaha un alumno ta demanda cierto atencion specifico y ta actua na un manera peligroso;
  • Tin biaha e presion den grupo bou di e alumnonan ta asina grandi cu peliger ta menasa;
  • Tin biaha circunstancia (malesa, morto, problema di capacidad, falta di placa) ta pone cu no ta tene cuenta cu reglanan di siguridad na scol (porta na yabi, bentana cera)

Fuera di esey por surgi situacionnan peligroso externo; desgracia, candela, molester di awa of pronostico di un horcan. No ta tur ora por garantisa siguridad, scolnan por bira consciente si di e riesgo y siguridad y tuma e precaucionnan preventivo y represivo necesario pa esaki.

 

Siguridad ta amplio

Ora ta trata di siguridad nos ta pensa lihe riba precaucionnan cu tin di haber cu siguridad fisico, manera un bon muraya rond di school, vigilancia y portanan cu alarma. Sinembargo siguridad ta hopi mas cu esaki y tin di haber cu:

  • e dominio espacial, e aspectonan den y rond di e edificio di scol;
  • e dominio institucional, e cooperacion entre scol y e diferente partnernan (aliadonan);
  • e dominio social, e contactonan dentro di scol, cuido di alumno y maestro y e clima di e scol;
  • e dominio criminologico, factornan cu por tin delincuencia y comportacion no desea como consecuencia, manera termento, posesion y uzo di arma, alcohol y droga.
  • e dominio di enseñansa, e calidad di enseñansa: con atractivo e lesnan ta, e profesionalismo di e docentenan y e resultadonan den enseñansa.

E cinco dominionan no ta para riba nan mes, pero ta influencia otro continuamente. Den cada un di e dominionan tin factor(nan) di riesgo cu ta causa insiguridad den y rond di scol.

 

Factornan di proteccion den un scol sigur

Banda di e factornan di proteccion tin algun tambe cu ta aporta positivamente na siguridad den scol. Factornan di proteccion ta e precaucion cu scol por tuma pa combati factornan di riesgo y haci e siguridad den scol mas grandi. Si haci un investigacion di e factornan di proteccion tin tres palabra clave cu ta resalta: atencion personal, participacion y mantencion di regla.

  • Atencion personal: alumnonan kier pa reconoce nan y duna nan merito. Si nan haci algo bon, nan kier tende esaki. Si nan tin problema, nan kier pa scucha nan. Y si nan sali for di man, nan kier pa hala nan atencion- aunke cu nan lo no admiti esaki publicamente. Den corto bisa, alumnonan kier ‘wordo mira’.
  • Participacion: door di participacion, alumnonan ta sinti nan mes mas liga na scol y uni cu otro. Si alumnonan mag di tuma decision riba maneho, siguridad y actividadnan (di scol), esaki lo influencia nan sentido di responsabilidad na un manera positivo.
  • Mantencion di regla: reglanan mester ta cla tanto pa alumno como pa personal, mescos ta conta pa e consecuencianan mara na kibramento di regla. Atencion pa mantencion di regla ta crucial. Ta fastioso pa mantene tur regla cu ta na vigor actualisa dentro di scol. Ta posibel por ehempel pa no solamente publica nan visualmente, pero pa trata tambe cada luna na pone un regla central.

Atencion personal, participacion, cuido y mantencion di regla ta sumamente importante pa un ambiente positivo y un bon clima na scol. Nan no ta solamente e base pa un ambiente di (siña) sigur, nan ta tambe principionan cu ta surgi for di e Tratado di Derecho di mucha. For di e Tratado aki ta surgi cu cada mucha ta conta, tin espacio pa diferencia, cu ta scucha nan ora di tuma decision cu ta concerni nan y cu e guia cu nan ta haya ta concorda cu nan capacidadnan di desaroyo.

 

Partners

E prome partidonan cu ta forma parti di e protocol ta Stichting Katholiek Onderwijs Aruba (SKOA), Cuerpo Policial Arubano, Ministerio PublicoDepartamento di Enseñansa Aruba, Telefon pa Hubentud y Fundacion Comunidad y Criminalidad (SMC).

E organisacionnan aki kier compromete nan mes conhuntamente pa e siguridad emocional y fisico di alumno- y maestronan den  scolnan Arubano. E intencion ta pa otro directiva di scolnan y mas instancia y NGO uni nan mes na e protocol.

Lo desaroya un manual di guia pa e diferente nivelnan di educacion. Lo introduci e prome manual, pa Enseñansa avansa, na cuminsamento di aña 2012. A base di instruccion, training y tayer lo instrui e scolnan cua ta e principionan di un scol sigur. Directiva di SKOA ta e prome cu a indica cu esaki lo tuma luga den tur scol di SKOA.

E manual "Traha na un Scol Safe" (2012) a bira posibel danki na financiamento di UNESCO y di Ministerio di Asuntonan Interior y  Relacionnan den Reino. Firmamento di e protocol a tuma luga diahuebs 24 di november den un ambiente ameno den auditorio di Colegio EPI.

Pa mas informacion por tuma contacto cu Stichting Maatschappij & Criminaliteit na (SMC) Esta dirección electrónica esta protegida contra spambots. Es necesario activar Javascript para visualizarla

 

 

Veilige School Gids

Werken aan een veilige school

mr. dr. Hellen A. van der Wal BA en Bert Wielenga M.Ed

Informatie en bestellingen: Esta dirección electrónica esta protegida contra spambots. Es necesario activar Javascript para visualizarla

 

 

Noticia

2015
18.11.15 Ministerio di Enseñansa lo financia proyecto "Anti-Bullying" pa tur scol na Aruba
18.05.15 Minister di Enseñansa ta reactiva Proyecto "Veilige School"
20.04.15 Lo fiha un Protocol di Comportacion na Scol
2012
29.08.12 Informatiebijeenkomst "Werken aan een Veilige School"
04.06.12 Protocol "Traha na un Scol Safe"
16.05.12 Bijeenkomst "Veilige School"
2011
05.12.11 Protocol pa siguridad na scol

 

Info/Contact
Departamento di Enseñansa Aruba (DEA)