Universidad di Aruba ta homenagea su miho graduadonan
Un biaha mas graduadonan a logra capta atencion di Universidad di Aruba y e facultadnan pa un conclusion di estudio di nivel halto. Universidad di Aruba a reconoce un grupo di graduado kendenan a sobresali danki na un investigacion exhaustivo y tesis cu ta sirbi como herment pa maneho.
|
Nivel di educacion ta ilustra den nivel di investigacion y tesis y esaki ta motibo tambe pa kico tur aña Universidad di Aruba ta organiza e ceremonia di ‘Student Award‘ cu ta conta tambe cu sosten di diferente compania cu ta patronisa e reconocimento. |
Durante e ceremonia cu a tuma luga na comienzo di e aña academico nobo den Aula, Rector Dr. Glenn Thode a mustra cu su meta semper tabata pa Universidad di Aruba bira un comunidad riba su mes y cu ceremonianan manera e Student Award ta contribui na esaki.
Mesora el a duna palabra na e maestronan di ceremonia Sinthya Ridderstaat di e programa Organization, Governance and Management di e Facultad di Arte y Ciencia (FAS) y Sadrick Clay, kende ta na Aruba como un studiante di intercambio for di Universidad di South Carolina. Es mas, e hecho cu por a conta cu un studiante di Universidad di South Carolina cu a mustra interes pa fungi como Maestro di Ceremonia tambe ta ilustrativo di un interes pa contribui na e comunidad di Universidad di Aruba.
 |
Cada facultad cu nan programanan a scohe e studiantenan cu a gana un reconocimento. E evaluacion tabata den man di un comision special, no solamente pa e nivel di locual a keda presenta, pero tambe e relevancia pa comunidad. Cada facultad ademas a traha cu companianan local cu aña tras di aña ta sostene e Student Award cu premionan special pa e graduadonan.
Asina CATC a duna e premio pa e miho tesis di e Facultad Financiero Economico (FEF). Un comision di FEF a recomenda dos tesis pa e premio y finalmente CATC a scohe e tesis ganado.
E premio aki a bay pa Vernalisa Franken, kende na e momentonan aki ta na Zwolle, studiando pa su Masters. Franken a concentra su investigacion na Departamento di Salud Publico (DESPA). Decano Joost Jacobs a mustra cu DESPA tabata asina impresiona cu e trabou di Franken, cu ya caba a mustra di lo tuma recomendacionnan pa mehora e sistema di comunicacion den e departamento.
 |
Tres studiante di FAS a haya premio. FAS ta e facultad mas nobo di Universidad di Aruba y ta ofrece tres programa, cu ta Social Works and Development; Organization, Governance and Management y Wiskunde, cu ta un programa special cu ta tene cada dos aña. E prome di FAS cu a ricibi su premio tabata Dino Cesar Quandt, kende contrario na otro programanan, no a traha un tesis. E programa di Wiskunde no ta rekeri tesis, sino studiantenan mester acumula un portofolio. Y e portofolio di Quandt, kende ya caba tabata traha como Docente Bouwkunde, tabata uno impresionante, cu ta inclui un proceso online pa educa Wiskunde. Quandt a ricibi su premio for di ENNIA, den presencia di e Decano di FAS, Tim Croes.
Clementia Eugene representando e programa Social Works and Development a honra graduado Indrah Zievinger pa su investigacion y tesis riba sistemanan nobo pa cuido di hendenan grandi. Zievinger a core pasantia na Corsow, SABA y Aruba. Aruba Bank a otorga e premio pa su tesis.
Kizas e persona cu mas a yama atencion tabata Nurienne Helder di e programa Organization, Governance and Management. Helder kende a representa Aruba den e Parlamento Hubenil di Reino a enfoca riba e maneho di Diabetes na Aruba. Y e storia aki ta hopi personal, pasobra Helder, mientras cu e tabata studiando na Aruba, a haya Diabetes agudo y tabata hospitalisa pa hopi tempo. Sinembargo, Helder no solamente tabata den diferente actividad comunitario di Universidad di Aruba, pero a dirigi su atencion na su estudio. Na e momentonan aki Helder ta studiando pa su Masters na Hulanda y su mama a ricibi e premio for di Yolanda Richardson di Organization, Governance and Management y Pierre Rafini di RBC.
Madhu Jadnanansing, Vice Decano di e Faculty of Hospitality and Tourism Management Studies a yama dilanti Jennifer-Lou Richardson kende a impresiona e comision cu su tesis riba mercadeo basa riba relacion a gana e premio patrocina pa e Fundacion Famia Malmberg di De Palm Tours.
 |
 |
Finalmente Stacey Kransen di Facultad di Derecho a ricibi e premio di VanEps Kunneman vanDoorne, representa pa Mr. Jeanot de Cuba pa e miho tesis. Segun Decano Fiona Bogaerts, Kransen hunto cu su colega Ruthlene Web ambos a gradua cu un 9 pa nan tesis. Sinembargo, e compania di abogado a califica e analisis huridico riba e tema ‘Tatanan di Derecho tambe’ como hopi relevante.
Tur esnan homenagea ademas a ricibi un recuerdo di Universidad di Aruba, cu tambe tabata e logo pa e ceremonia. A diseña un Lotus special, cu ta representa humildad y pasion na mesun momento.
Info | Contact
Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].
Scroll To Top
