Traspaso di e cartera di Enseñansa

November 29, 2017

E traspaso oficial di e cartera di enseñansa a tuma luga entre ex-minister Hooyboer-Winklaar y e minister recien huramenta, dr. Armando Lampe.

Durante e traspaso a duna un splicacion di diferente proyecto, tanto esnan den ehecucion y esnan cu ta cla pa cuminsa, como esnan cu a keda pendiente pa decisionnan di e minister nobo.

A duna un splicacion amplio riba e parti di infrastructura cu ta keda un reto, caminda durante e ultimo cuater añanan a haci un inversion di mas of menos 38 miyon florin pa renoba diferente edificio di scol, pero cu ainda tin un lista di proyectonan di infrastructura pendiente pa wordo ehecuta.

Tambe a presenta un documento cu tur informacion necesario di e maneho y un relato financiero.

Minister dr. Lampe ta considera continuacion den gobernacion importante. E minister ta di opinion cu mester anda na un manera responsabel cu e placa di pueblo y esaki ta encera cu na momento cu un gobierno cambia di signatura, tin continuidad di gobernacion, mustrando asina respet pa e fondonan publico.

E minister a aprecia cu sra. Hooyboer-Winklaar a tuma tempo y a haci e preparacionnan necesario pa por duna informacion di e proyectonan andando. E minister a comenta di lo duna tur sosten na esakinan pa asina no comete ningun tipo di capital vernietiging.

Minister dr. Lampe a haci pregunta specifico riba e parti di digitalisacion den enseñansa, mirando cu esaki lo tin prioridad maximo di su banda. Esey ta e futuro rond mundo y ta di opinion cu nos enseñansa na Aruba mester drenta full speed den e era digital.

E minister a sigura cu e lista di scolnan cu mester di atencion pa loke ta trata infrastructura tambe lo tin su atencion.

Hooyboer-Winklaar a desea e minister nobo  y su team hopi exito, y a mustra disponibilidad pa duna informacion adicional y pa yuda den cualkier forma pa logra metanan positivo pa Enseñansa na Aruba.

 


Info / Contact

Pa mas informacion por busca [M] Minister – Ministerio di Enseñansa den e alfabet menu riba homepage of por tuma contacto cu: Ministerio di Enseñansa

Scroll To Top
  • © 2011-2017 Department of Education Aruba (DEA)
  • T +297-528-3400
  • F +297-528-3434
  • info@ea.aw