Towson University y St. Mary’s College of Maryland

May 18, 2016

Recientemente Minister di Enseñansa Michelle Hooyboer-Winklaar a biaha pa Merca y Canada pa sigui sondea diferente posibilidad pa intercambio y colaboracion pero tambe posibilidad pa mas di nos studiantenan studia den e region ey.

Minister Hooyboer-Winklaar ta premira cu tin mas espacio pa expande e oportunidadnan pa nos studiantenan na Merca y Canada. Den cuadro di esaki a scoge 2 universidad pa bishita na e estado di Maryland, esta Towson University y St. Mary’s College.

Towson University

Durante su bishita na Towson University, Minister Hooyboer-Winklaar a reuni cu un delegacion amplio di diferente ehecutivo di e scol pa papia tocante di e posibilidadnan.

“Towson University a ricibi nos como famia, ya cu studiantenan di Instituto Pedagogico Arubano (IPA) recientemente a bishita e scol pa nan module di Perspectiva Mundial unda studiantenan ta bishita otro paisnan pa experencia first hand kico e ta pa duna les na otro paisnan. Mi ta hopi orguyoso cu nan a laga atras un imagen hopi impresionante”, e Minister a splica. “Towson ta hopi interesa pa ricibi mas studiante di Aruba pa studia full-time y pa cu esaki nos ta trahando riba un acuerdo cu lo brinda mas accesibilidad pa studiantenan interesa den e opcion aki”, Minister Hooyboer-Winklaar a informa.

Towson University ta un universidad publico cu ta conta cu alrededor 22 mil studiante, di cual 2% ta internacional. Un universidad di calidad halto na Maryland cu ta “ranked” 12 den universidadnan publico segun e “U.S. News Best Colleges Ranking”. Recientemente a nombra Towson University como un di e universidadnan mas “environmentally responsible” segun Princeton Review.

Website: [Towson University]

 

St. Mary’s College of Maryland

Durante bishita na Annapolis, Maryland, Minister di Enseñansa di Aruba a haya oportunidad pa topa cu ehecutivonan di St. Mary’s College of Maryland, un universidad prestigioso na Maryland estableci na aña 1840.

E universidad ta conta cu un populacion relativamente chikito di alrededor di 2.000 studiante, dunando nan un experiencia unico y un ratio entre studiante y profesor sumamente abou. A nombra St. Mary’s como #6 di Top Liberal Arts Public Schools, den ranking anual di e “U.S. News Best College and Universities Report”.

Algun di e programanan cu ta ofrece ta inclui Computer Science, Economics, Mathematics, Physics, Psychology, Media Studies, Environmental Studies y Music pa menciona algun.

“Nos ta mira St. Mary’s college como un opcion clave pa nos studiantenan, considerando e calidad halto, e hecho cu esaki ta e unico Public Honors College den e estado Maryland y cu ta ofrece varios programa atractivo pa nos studiantenan”, Minister Michelle Hooyboer-Winklaar a splica despues di su reunion cu e Vice President of Enrollment and Dean of Admissions y tambe cu e Provost di St. Mary’s.

Pronto lo comparti mas informacion pa asina studiantenan cu ta sondeando nan escogencia pa estudio superior, dunando asina un opcion mas banda di tur otro cu ta existi.

Website: [St. Mary’s College of Maryland]

 


Info / Contact

Pa mas informacion por busca den e alfabet menu riba homepage:  [S] Studia na Merca  of por tuma contacto cu DEA > afdeling Studiefaciliteiten.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw