Ta tuma un curason grandi pa forma mente chikito
Justy Lopez ta conta un poco di su evolucion di studiante di Instituto Pedagogico Arubano (IPA) pa maestro na Scol Preparatorio Tarcisius.
 |
“Na aña 2014, mi a cuminsa cu e estudio pa bira maestra di scol primario na IPA.”
“Mi ta satisfecho cu mi a caba mi estudio y awo, trahando, mi por brinda tur locual m’a siña na IPA den mi klas.” |
 |
 |
“Mi por bisa cu nunca como maestra bo ta stop di siña.”
“Tur dia bo ta siña algo nobo di bo muchanan y esey ta algo cu ta pone abo como maestra busca otro forma di duna les pa asina bo por brinda esakinan na bo muchanan.” “Calidad den les ta algo cu mi ta para 100% su tras.” “Tur mucha merece calidad den enseñansa pa por crece den nan desaroyo y bira un persona ehemplar den nos comunidad.” “Mi stima locual mi ta haciendo y mi ta contento cu awo mi tin mi mesun klas p’asina mi haci un diferencia den bida di e muchanan.” “It takes a big heart to shape little minds”. |
IPA ta invita tur studiante di HAVO, VWO y MBO nivel 4 y tur otro persona interesa pa cuminsa un estudio pa maestro pa asisti na IPA su Dia Publico (Open dag) dia 17 di November 2018. IPA su Dia Publico lo ta di 10or di mainta te 2or di atardi na IPA (Isaac Wagemakerstraat 11, San Nicolas).
Durante e Dia Publico lo duna informacion di e estudio di Maestro pa Enseñansa Primario, Bachelor Hulandes y e curso di PDG. Tambe lo duna informacion tocante e Test di admision y 21+ Toets. Naturalmente lo tin oportunidad pa inscribi como studiante. Pa por inscribi na IPA mester trece e papel di registro civil (papel di AWG 5). E gastonan di inscripcion ta AWG 75,-. Pa inscripcion di e estudio di Maestro pa Enseñansa Primario y Bachelor Hulandes mester bin cu copia di diploma di sea HAVO, VWO of MBO nivel 4. Pa inscripcion di e curso di PDG mester bin cu copia di diploma di sea HBO of WO.
Banda di esaki por cera conoci cu e instituto en general y e ambiente estudiantil en particular y conoce nos facilidadnan. Ademas lo tin oportunidad pa combersa cu nos studiantenan actual. Tambe lo tin un ‘Food & Bake Sale’ organisa pa nos propio studiantenan. E benta di cuminda aki tin como meta pa recauda fondo pa e studiantenan di aña 3 cu pronto lo biaha pa exterior pa nan pasantia internacional. Di e manera aki IPA ta brinda henter Aruba un dia special di orientacion, yen di informacion y actividad.
Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website ipaaruba.com.
Info / Contact
Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA
Scroll To Top
