STEAM Camp

October 7, 2016

Den cuadro di Luna di EnseñansaMinisterio di Enseñansa den colaboracion cu International School of Aruba a organisa un STEAM Camp pa un grupo di alumno di 10 di scol basico, cu e meta pa brinda e muchanan cu un experencia educacional unico y dibertido durante e siman di vakantie.


STEAM ta para pa “Science, Technology, Engineering, Arts & Math” y ta encera un programa extenso y innovativo unda cu e diferente disciplina nan menciona ta wordo integra pa medio di diferente topico y ehercicio.

E hobennan mester a colabora den grupo y explora, investiga, analisa, calcula y diseña.

Un total di 60 alumno di 10 diferente scol basico di nos isla a participa na e STEAM Camp aki cu a resulta un exito rotundo. Scolnan local a selecta 6 alumno di nan scol pa por participa na e camp aki. E 10 scolnan cu a participa ta Commandeur Pieter BoerschoolColegio Bon BiniColegio San HoseSt. Anna SchoolSt. Franciscus CollegePaulus SchoolCacique Macuarima SchoolReina Beatrix SchoolO.L.V. Fatima College y Scol Primario Kudawecha.


Minister di Enseñansa Michelle Hooyboer-Winklaar a bishita e alumnonan na e camp y a keda impresiona pa nan entusiasmo y envolvimento den e programa. E titular di enseñansa a combersa cu e diferente gruponan y por a mira un interaccion masha positivo. Tur grupo tabata trahando duro pa finalisa nan producto final pa e exposicion cu tabata encera e diseño y construccion di nan scol ideal. E scol mester tabata completamente sostenibel y e alumnonan mester a tene cuenta cu elementonan externo di naturalesa pa cu e diseño.


Minister Hooyboer-Winklaar a indica cu tabata impresionante pa mira e creatividad di e alumnonan pero tambe pa tende nan punto di bista critico riba diferente topico actual manera energia sostenibel.

Banda di e programa, e camp a inclui lunch y transporte pa cada participante unda cu e alumnonan a wordo busca y baha tur dia cu bus na nan cas. E camp a finalisa diabierna unda mayornan di e alumnonan participante a ricibi un invitacion y a haya  oportunidad pa aprecia e producto final di e alumnonan pa medio di un exposicion y unda cu e alumnonan a comparti nan experencia di e siman.

Minister Michelle Hooyboer-Winklaar a gradici e scolnan basico y e mayornan pa nan cooperacion. Un danki grandi ta bay pa International School of Aruba cu a ehecuta e proyecto aki na un manera hopi positivo. E Minister ta hopi contento di por a contribui pa haci e STEAM Camp aki posibel pa nos hobennan y ta spera di por sigui cu e iniciativa aki pa asina mas alumno por haya chens pa participa.

 


Info | Contact

Pa mas informacion por busca [I] ICT den Enseñansa den e alfabet menu riba homepage of por tuma contacto cu Ministerio di Enseñansa

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw