Resultado y procedura Nationale Doorstroomtoets
Dia 6 y 7 di mei 2019 a tuma luga na tur scol basico di Aruba e ‘Nationale Doorstroomtoets’ pa tur mucha den klas 6. Esaki como parti di e maneho nobo pa e procedura di fluho pa scol avansa.
Alumunonan cu ta sali di scol basico y ta continua nan carera escolar na un scol avansa ta ricibi un asina yama ‘schooladvies’ cu ta indica si e carera escolar mester sigui na EPB, SPO, MAVO of HAVO/VWO. E conseho di scol aki ta wordo duna a base di nan rapportnan y desaroyo durante nan carera escolar na scol basico. Den pasado ta alumnonan cu un ‘schooladvies’ pa HAVO/VWO so tawata haci e asina yama ’ toelatingstoets’ pa por drenta Colegio Arubano of Colegio San Nicolas.
Dia 3 di juni 2019 tur scol basico na Aruba a ricibi e resultado di e Nationale Doorstroomtoets.
Resultado di e Nationale Doorstroomtoets
E gemiddelde pa taal y rekenen pa tur scol hunto ta:
- Taal 6.4
- Rekenen 6.4
Di tur scol afgerond:
- 20% di e alumnonan a score nivel HAVO/VWO
- 40% di e alumnonan a score nivel MAVO
- 40% di e alumnonan a score nivel EPB
Manera stipula, e advies di scol ta conta banda di e score riba e toets. Den caso cu tin diferencia, ta e nivel cu ta mas halto ta esun cu ta determina cua nivel e alumno por bay.
Den cuadro di mehoracion di e calidad di enseñansa na Aruba, e resultado di e toets aki lo wordo analisa mas profundamente door di Departamento di Enseñansa y Dienst Inspectie van het Onderwijs. Cada directiva di scol y cada scol a haya e resultado pa asina nan tambe por analisa esaki pa mehora e calidad di enseñansa cu nan ta brinda.
Pregunta frecuentemente haci tocante e doorstroomtoets
Kico ta un Nationale Doorstroomtoets?
Kico ta pasa si e resultado di e doorstroomtoets ta indica un otro nivel di enseñansa secundario cu e schooladvies a duna anteriormente?
Un scol secundario por nenga mi yiu di drenta a base di e resultado di e doorstroomtoets?
Mas pregunta tocante e Nationale Doorstroomtoets:
Na Aruba nos conoce 2 schoolbestuur cu ta ofrece enseñansa pa HAVO/VWO: esakinan ta SMOA (Colegio Arubano) y DPS (Colegio San Nicolas).
Pa MAVO tin SKOA (Colegio San Antonio, La Salle College, Maria College, Filomena College y Colegio San Augustin), DPS (C.G. Abraham de Veer, Ceque College y Juliana School) y SPCOA (Mon Plaisir College y John Wesley College).
Pa Enseñansa Profesional Basico nos tin SEPB (EPB San Nicolas y EPB Hato) y pa scol avansa special nos tin DPS (SPO Santa Cruz y SPO Savaneta).
E paso di scol basico pa scol avansa ta uno hopi grandi y tin hopi influencia riba e carera escolar di un hoben. Pa e motibo aki ta importante pa e mayor- y maestronan di scol basico comunica bon cu otro y tene cuenta cu e situacion di cada alumno individual, pa asina haci e escogencia cu lo benificia e alumno mas hopi y cu lo sostene su desaroyo intelectual y social-emocional.
Ministerio di Enseñansa y Departamento di Enseñansa Aruba ta haci uzo di e oportunidad aki pa desea tur e alumunonan den klas 6 hopi exito y un carera fructifero na scol avansa.
Info / Contact
Departamento di Enseñansa Aruba (DEA)
Scroll To Top
