Ley di kinderopvang aproba den Parlamento

June 6, 2017

Dia 5 di juni, Parlamento di Aruba a trata dos ley presenta pa Minister di EnseñansaMichelle Hooyboer-Winklaar.

E prome ta e Ley di Kinderopvang (Ley di Crèche) y e di dos ta  Begroting Onderwijsfonds 2017. Ambos ley a conta cu sosten unanime di tur fraccion den Parlamento.

 

Kinderopvang

 

 

E Ley cu ta trata Kinderopvang, miho conoci como e Ley pa regula Crèche of Centronan di Cuido, ta regarda e reglamento y supervision di tur Centro di Cuido di mucha na Aruba.

Por lo menos 55 aña pasa e prome centro a habri su porta y 28 aña pasa a skirbi e prome concepto di ley.

Durante e ultimo decadanan e necesidadnan di e centronan aki a sigui aumenta, pero nunca a pasa y ehecuta un ley pa stipula condicionnan pa regula e calidad cu e centronan ta ofrece.

Den pasado a hasta pasa varios incidentenan cu mucha, y sin un ley no por a haci mucho pa atende riba e falta di siguridad na algun centro.

 

A tene cuenta cu e aspecto cu cualkier exigencia di ley demasiado pisa of rapido por causa un impacto riba prijs, y pa esaki e punto di salida di e ley tabata pa haci den fase, cu exigencianan logico y rasonabel, y dunando un periodo di tempo amplio pa por cumpli cu tur rekisito. Tur esaki cu enfasis riba calidad y siguridad di nos muchananMinister Hooyboer-Winklaar a splica.

Cu introduccion di e ley aki a opta pa traha den fase, pa asina duna e centronan suficiente tempo pa adapta si mester pa por cumpli cu e ley y pa yuda nan brinda un miho calidad.

E ley ta encera entre otro e nivel di enseñansa minimo cu esunnan cu ta traha den un centro mester tin (LBO), e leidster/mucha ratio, es decir kico ta e cantidad maximo di mucha pa cada lider cu e centro por tin y kico ta e aspectonan di siguridad y higiena cu mester tene cuenta cune pa opera un centro.

Banda di esaki ta stipula e obligacion pa centronan registra y ricibi un permiso pa por opera.

E aspecto di opleiding tambe ta wordo regla den e ley, y aki ta unda Gobierno lo bin cu e programa di training pa esunnan cu ta traha den e centronan pa ofrece LBO opleiding pa tur cu ainda no tin diploma. Den e training aki lo tene cuenta cu e experencia cu e lidernan tin y cu e competencianan cu nan a adkiri den nan trabou.

Pa loke ta trata e ratio, artikel 13 ta referi na e cantidad di mucha per begeleider:

a.  max. 6 mucha entre edad 6 siman te 1 aña
b.  max. 10 mucha entre edad 1 te 2 aña
c.  max. 12 mucha entre 2 aña te cu 3 aña
d.  max. 13 mucha entre 3 aña te cu 4 aña

Si ta trata di grupo di edad mixto, e ta e averahe di e dos categoria.

 

Awor cu a aproba e ley, Gobierno lo stipula un fecha cu e ley lo drenta na vigor. Esaki ta premira entre 6 pa 12 luna y pa e diferente exigencianan di calidad lo stipula periodonan di transito. Un ehempel ta cu lo duna un periodo di transito di dos aña pa e ratio, esta e cantidad di mucha per begeleider.

Lo traha hunto cu Fundacion Pa Nos Muchanan y e Centronan pa trece tur informacion necesario cerca e Centronan di Cuido.

Mi ta sumamente orguyoso di e aprobacion di e dos leynan aki, specialmente e ley di Kinderopvang, mirando cu e necesidad pa duna mayornan e trankilidad cu nan yiunan lo wordo bon cuida ta algo cerca di mi curason. Mi ta gradici Parlamento di Aruba pa e sosten ricibi awe. Tambe mi kier gradici tur instancia cu a traha duro awor y den pasado pa por yega na e ley aki. Awor nos lo bay traha riba implementacion di e ley cu ta encera varios paso hunto cu diferente stakeholders.” Minister Hooyboer-Winklaar a finalisa bisando.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw