Search Facebook Instagram Twitter

Leerplicht lo keda introduci den fase

March 22, 2012

Recientemente e Leerplicht Ambtenaren y otro personanan cu lo hunga un rol den implementacion di e ley di leerplicht, manera Polisnan di Bario, a asisti na un serie di workshop.

Marianne van de Toorn, ex-leerplicht ambtenaar cu hopi experiencia trahando na Den Haag Hulanda, a wordo invita pa facilita algun sesion, caminda el a concentra riba e parti practico di e trabao.

“Leerplicht ta wordo introduci den fase, training ta e prome paso” segun sr. John Hessen.

E proceso di introduccion di enseñansa obligatorio na Aruba ta cay bou responsabilidad sr. Hessen, cu tin mas di 30 aña di experiencia den enseñansa como educador y den diferente funcionnan di liderazgo den e sistema di enseñansa.

Sr. Hessen ta splica cu e proceso pa implementa e ley ta bay tuma luga den fase. E parti di training di e futuro leerplicht ambtenaren ta hopi importante. Mes importante ta tambe pa e ambtenaarnan aki tin un bon relacion di trabou cu Polisnan di Bario (Bario Regisseur), ken ta bay brinda nan apoyo den nan trabou. Sr. Hessen a comenta cu satisfaccion cu tur hende a “click” hopi bon cu otro y e gruponan a traha hopi motiva durante e workshopnan.

Sr. Hessen ta añadi cu hunto e leerplicht ambtenaar y Polis di Bario por yega na solucion pa situacionnan dificil. Pa medio di bon cooperacion, nan por comparti nan experiencianan y bin cu bon solucion. Como cu e Polis di Bario ta conoci den e bario y conoce su bario bon, e ta un di e partnernan hopi importante pa Bureau Leerplicht.

A cera e siman di tayer cu un evaluacion di e cursonan y entrega di certificado na tur cu a participa.

Recientemente Bureau Leerplicht a ricibi tambe e yabinan pa su oficina, cual ta situa den e edificio di Shon Champi, net riba Casa de Lannoy.

Sr. Hessen ta splica cu e siguiente paso ta pa establece e Bureau fisicamente, pues “richt in” e oficinanan, sigui pa un campaña basta intensivo di informacion, unda cu lo comparti informacion cu scol, mayor y e comunidad en general, como tambe e instancianan cu nan lo ta trahando cu nan di cerca manera Bureau Sostenemi y Departamento di Asuntonan Social.

Sr. Hessen ta conclui bisando cu pa dia prome di augustus mester tin por lo menos e sistema di controla muchanan cu no ta bay scol den funcionamento y lo sigui traha via di un plan den fase te pa yega na introduccion di  sancionnan, pues  kico ta consecuencia ora cu topa cu e mucha y/of famia cu no kier cumpli cu e ley di enseñansa obligatorio.

 


Info / Contact

Pa mas informacion busca [E] Enseñansa obligatorio of [L] Leerplicht den e alfabet menu riba homepage, of tuma contacto cu Bureau Leerplicht.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets