Fundacion Educador Consciente Aruba a wordo lansa
Recientemente durante e siman di e tercer edicion di e evento internacional di Conscious Discipline na Aruba yama Conscious Discipline Summer Institute (CD1), e organizacion nobo yama Fundacion Educador Consciente Aruba (“FECA”) a wordo lansa.
FECA a wordo introduci na Aruba pa sigui cu e trabou cu Develop to Grow ta bin ta hasi pa 13 aña y semper cu inmenso sosten di publico en general. FECA a wordo lanta cu mira riba e profesionalisacion di e servicio di brinda e programa Conscious Discipline na Aruba y region di Caribe riba un base non-profit.
FECA ta consisti di un team dinamico cu durante e ultimo añanan a forma conocimento substancial y abilidadnan importante encuanto e programa di Conscious Discipline.
E meta di e programa di Conscious Discipline ta pa desaroya e inteligencia emocional cerca adultonan pa asina nan por sinja abilidadnan social y emocional cu ta esencial den nos muchanan.
Durante e siman di CD1, Aruba tabata un biaha mas e plataforma den region pa trece hendenan hunto cu ta eherce y kier profesionalisa e uso di Conscious Discipline. Aruba ta e prome pais den Caribe cu a introduci e programa di Conscious Discipline den region y ta lidera e movimento aki den region.
Durante CD1, Aruba ta host e evento internacional unda localnan y bishitantenan ta experiencia durante un siman diferente trainingen y breakout sessions cu ta yuda desaroya participantenan cu ta eherce Conscious Discipline den nan bida diario y trabou.
Al momento FECA tin 4 instructor certifica cu ta duna training. Tambe tin 15 voluntario cu ta yuda cu promove Conscious Discipline y organisa eventonan den region di Caribe.
Awor cu FECA a wordo lansa, e directiva y voluntarionan lo sigui cu e trabou importante y interesante pa Aruba y e region di Caribe.
E meta di FECA ta pa contribui na e bienestar di nos comunidad door di ofrece tur educadornan – sea mayornan, cuidadornan, docentenan, hendenan cu ta traha cu mucha – e oportunidad pa rekeri conocimento y herment pa anda cu problemanan social-emocional.
Awendia hopi mayor y otro educadornan di mucha tin hopi pregunta con pa educa y guia muchanan pa nan scucha miho, ta mas motiva, por anda cu nan emocionan y cumpli cu regla. Conscious Discipline ta un metodo cu ta yuda e adulto pa ta mas exitoso den su educacion.
Info / Contact
Pa mas informacion por busca [D] Disciplina Consciente of [C] Conscious Discipline den e alfabet menu riba nos homepage of tuma contacto cu:
- Fundacion Educador Consciente Aruba
- Departamento di Enseñansa Aruba (DEA) seccion Guia (afdeling Begeleiding)
