DEA ta entrega metodo “Taalpret” na ISA

September 21, 2018

Recientemente a tuma luga entrega di e metodo di Hulandes como idioma stranhero “Taalpret” na International School of Aruba (ISA). E directora a keda masha contento cu e metodo y mesora lo implementa esaki na su scol.


Momento cu sra. Babette van Abs ta ricibi e metodo for di sra. Carola Peeters di seccion Desaroyo di Curiculo di Departamento di Enseñansa Aruba.


Seccion Desaroyo di Curiculo di Departamento di Enseñansa Aruba (DEA) a desaroya y publica e metodo “Taalpret” pa scol preparatorio.

Taalpret ta un metodo pa e materia Hulandes cu ta basa riba didactica di “Total Physical Repsonse” (TPR) cu ta un forma di enseñansa di idioma stranhero cu acercamento orienta riba accion. E metodo ta brinda actividad cu tin sentido pa e mucha pa asina e siña e idioma aunke cu apenas e ta domina Hulandes.

Un meta importante di e metodo ta pa e mucha siña Hulandes den un forma placentero. Ta stimula e mucha anda cu e idioma stranhero como medio di comunicacion den un situacion real di scol.

E metodo ta consisti di diferente manual pa e maestro, buki di potret, baki di carchi, wega di mesa di bestia y diferente ilustracion pa sostene e lesnan.

Taalpret ta pone hopi enfasis riba ampliacion di vocabulario. Na final di e prome aña di scol preparatorio e mucha por compronde 800 palabra na Hulandes y na final di e di dos aña ta duplica e cantidad aki. E temanan di Taalpret ta topiconan actual pero ta trata tambe topiconan cu ta mas leu di e mucha su mundo.


A desaroya e metodo inicialmente den cuadro di e Proyecto Scol Multilingual y a inicia cu implementacion di e metodo prome na e scolnan piloto, cualnan ta Conrado Coronel y Trupial. Banda di e dos scolnan aki tabata tin hopi interes di parti di mas scol pa implementa e material den nan scolnan. E seccion Desaroyo di Curiculo di DEA a sostene e otro scolnan aki den implementacion di “Taalpret”, den su version provisorio. Den e aña escolar 2016-2017 a publica e material cu entretanto a keda entrega na tur scol preparatorio. Den e aña escolar 2017-2018 Centro pa Desaroyo Continuo (CDPC) di Instituto Pedagogico Arubano a ofrece guia na algun scol preparatorio con pa anda cu e metodo, haciendo uzo di didactica nobo dirigi riba idioma stranhero (vreemdetaal didactiek).

Realisacion di e metodo tabata posibel danki na un ekipo di desaroyador di e seccion Desaroyo di Curiculo den cooperacion estrecho cu experto di Hulanda, sr. Frans Teunissen kende a specialisa su mes den desaroyo di idioma stranhero cu amplio experiencia den e tereno.

E metodo Taalpret ta un trabou pionero den mundo ya cu na ningun parti di mundo a desaroya material di Hulandes como idioma stranhero pa mucha jong. E material a capta hopi interes tambe di e islanan Corsou, Boneiro y Saba.


 


Info / Contact

Pa mas informacion por busca [C] Curriculum ontwikkeling den e alfabet menu riba homepage of por tuma contacto cu DEA | Curriculum ontwikkeling.

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw