BNA cu Festival di Buki pa Mucha

October 20, 2016

Apertura di Festival di Buki pa Mucha ta diabierna dia 28 di october. E aña aki atrobe e festival tin tur potencial pa bira un fiesta di buki grandi y un experencia unico pa nos muchanan na Aruba.

Apertura  Programa BNA
 

 

Comision di Festival di Buki pa Mucha di Biblioteca Nacional Aruba ta hopi contento cu e apoyo cu e festival ta haya. Tanto di libreria como di scolnan participante. Tur aña maesto y maestra ta prepara nan klas pa bishita di un autor, contador di storia of un ilustrador.

Biblioteca Nacional ta invita autor di buki local y di otro pais y isla pa duna presentacion na mucha pa asina stimula nan interes pa e mundo di buki, storia y imahen. Tambe biblioteca ta invita contador di storia, ilustrador, musico, coro di mucha y gruponan teatral pa duna contenido na un siman di Buki pa Mucha.

Programa

E festival ta habri cu un presentacion di tur autor y ilustrador combina cu un presentacion di muchanan di scol y un mercado di buki pa mucha.

E aña aki a toca turno na Scol Basico Prinses Amalia pa prepara un presentacion durante apertura. Tur esaki ta tuma lugar diabierna atardi dia 28 di october patras di Biblioteca Nacional na Playa.

Ta sigui un siman di bishita na 60 scol basicoprimario y special.

Biblioteca tambe ta ofrece diferente actividad pa mucha den cuadro di su Festival di Buki pa Mucha. Muchanan por topa cu e autornan di dialuna 31 di oktober pa diahuebs 3 di november entre 3or y 4or di atardi. Lo tin contamento di storia, musica, canto y baile.

Na Biblioteca Nacional na Playa lo tin presentacion di Roland Colastica (dialuna), Jeroen Hoogerwerf Liliana Braamskamp-Erasmus (Diamars), Mylo Freeman (Diaranson) y Indra Hu Sandra Purperhart (Diahuebs).

Na Sta. Teresita CenterSan Nicolas tambe tin presentacionnan special di 3or pa 4or. Mylo Freeman (Dialuna), Leo Regals (Diamars), Monica Clarinda (Diaranson), Roland Colastica (Diahuebs).

Tur mucha ta bon bini. Presentacionnan ta completamente gratis. Por bay Biblioteca cu Oma cu Opa pa asina haci e atradi mas special.

Lema pa 2016

Lema di e festival pa 2016 ta ‘Opa y Oma, conta mi y inspira mi. Cu e lema aki ta pone atencion riba e famia, welo cu wela cu por yuda nan nietonan activamente cu lesamento door di lesa pa y cu nan y conta storia.

E aña aki e autor di e serie di buki pa mucha Koen Kampioen y “James Blond, sr. Fed Diks a skirbi e buki pa e Festival di Buki pa Mucha 2016 Superwela den comaRudyomar Leysner a ilustra e buki di e festival.

Autor local participante

E autornan di buki pa mucha di Aruba ta Mariebelle ArendsLiliana Braamskamp-ErasmusRichard DabianIrmgard FransDolfi Kock Belen Kock-MarchenaRudyomar Leysner (ilustrador di e Regalo di Siman di Buki 2016), Vanessa PaulinaSergio Tjie-A-Loi Gino Vrolijk.

Comision di Festival di Buki pa Mucha ta hopi contento di por conta cu un grupo di profesional y creativo pa entusiasma mucha pa lesa buki. Ta spera cu e bishitanan na scol lo duna e muchanan mas smaak pa lesa, scucha storia y aprecia imahen y dibuho den buki y/of interesa nan pa e profesion di autor of ilustrador.

Ilustrador local

E aña aki tin 2 ilustrador local ta participa na e Festval di Buki pa MuchaRudyomar Leysner Vanessa Paulina. Nan lo bishita diferente scol pa duna presentacion di nan ilustracionnan. Rudyomar su specialisacion den arte ta dibuho. Pa profundisa su mes den arte Rudyomar a studia na Colombia y despues a presenta diferente exposicion na Aruba tanto exposicion solo como exposicion di grupo. Rudyomar a keda selecta pa e commission ‘Hoben y Talentoso‘ y e publicacion di dicho comision. Rudyomar a ilustra e buki di festival titula ‘Superwela den coma.

Vanessa Paulina ta un artista y ilustrador conoci den nos comunidad tambe pa su “murals”. Vanessa Paulina a studia Fashion Design y a specialisa den ilustracion. Tres publicacion di Vanessa Paulina ta ‘Tocht over de rivier, ‘Puppie’s verhaal‘ y ‘Wat wordt ik later‘.

Vanessa a ilustra dos buki di autora Hilli Arduin titula ‘Ik neem je mee y ‘A boi koni‘. Ademas Vanessa ta conoci pa su serie di cuadra ‘Childhood series‘ y ‘Schizophrenia series‘ y su ultimo proyecto ‘The Goddesses‘. Mas informacion riba website di Biblioteca Nacional Aruba. Tambe pa haya sa mas di e otro autornan y ilustrador cu ta participa na e festival por acudi na BNA su website pa wak e.o. un entrevista cu escritora di buki pa mucha, Liliana Braamskamp-Erasmus.

Apertura

No perde e apertura di Festival di Buki pa Mucha cu ta tuma lugar diabierna atardi dia 28 di october.

 


Info / Contact

> Biblioteca Nacional Aruba (BNA)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw