Arubahuis a ricibi studiantenan di Aruba na Hulanda

August 7, 2019

Den Haag  – E team di Arubahuis, e mentornan y e miembronan di e diferente Plaatselijke Opvang-Commissie (POC) a ricibi nos hobennan cu ta bay studia na Hulanda.


Prome grupo di studiante a yega bon Hulanda

Den Haag  – Cu vuelo 769  di KLM a yega 31 di juli un cantidad di 93 studiante di Aruba pa sigi un estudio avansa na nivel di HBO of Universidad na Hulanda. Esaki ta e prome vuelo cu studiante cu ta yega Hulanda. Ta trata aki di studiantenan cu ta bay studia na Maastricht, Eindhoven, Tilburg, Breda, Groningen, Leeuwarden, Arnhem, Nijmegen, Wageningen, Almere, Amsterdam, Enschede y Zwolle.

Na Schiphol un delegacion consistiendo di Minister Plenipotenciario Guillfred Besaril, Minister Plenipotenciario Suplente Eddy Paris, functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) a ricibi e studiantenan.

Pafor di e sala di yegada e studiantenan a keda ricibi y yama bon bini na Hulanda door di Minister Besaril y sr. Paris. Na un forma bon organisa e studiantenan a haya instruccion di personal di Cas di Aruba, mentornan y miembronan di e POC unda nan mester a para den grupo pa warda nan turno pa bai na e bus cu lo hiba nan na nan ciudad di estudio. Mescos cu tur aña Robby Schouten tabata presenta na Schiphol pa haci un reportahe di e yegada di e studiantenan pa su programa Leu foi Cas.

Mayan e studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis.


Di dos grupo di studiante a yega bon Hulanda

Den Haag  – Cu vuelo 767  di KLM a yega awe 1 di augustus un cantidad di 84 studiante di Aruba pa sigi un estudio avansa na nivel di HBO of Universidad na Hulanda. Esaki ta e di dos vuelo cu studiante cu ta yega Hulanda. Ta trata aki di studiantenan cu ta bai studia na Den Haag, Delft, Leiden, Rotterdam, Vlissingen y Utrecht.

Na Schiphol – mescos cu ayera – un delegacion consistiendo di Minister Plenipotenciario Guillfred Besaril, Minister Plenipotenciario Suplente Eddy Paris, functionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) a ricibi e studiantenan.

Despues cu e studiantenan a sali for di e sala di yegada nan a keda ricibi y yama bon bini na Hulanda door di Minister Besaril y sr. Paris. Na un forma bon organisa e studiantenan a haya instruccion di personal di Cas di Aruba, mentornan y miembronan di e POC unda nan mester a para den grupo pa warda nan turno pa bai na e bus cu lo hiba nan na nan ciudad di estudio.

Mayan e studiantenan lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia nesesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cai bou di Arubahuis. Riba tanto e website di Cas di Aruba www.arubahuis.nl como riba Facebook di Onderwijszaken di Arubahuis tin un reportahe fotografico extenso di e yegada di e studiantenan.


Den Haag, Leiden y Delft

Den Haag  – ‘Boso ta awor aki na Hulanda, pero corda semper di unda bo ta bin. Si bo sa di unda bo ta bin, bo sa tambe unda bo ta bay.’ Esaki tabata palabranan di Minister Plenipotenciario Guillfred Besaril na e grupo di studiantenan di Den Haag, Leiden y Delft cu a bishita Arubahuis.

Mirando cu e cantidad di studiantenan cu a bin pa studia na Den Haag, Leiden y Delft ta grandi (total 78 studiante) a dicidi pa parti e grupo den dos dia.

Minister Besaril a cuminsa na yama e studiantenan bonbini na Arubahuis. E mandatario a bisa di ta topa cu e studiantenan pa duna nan informacion y sigura cu tur e precondicionnan ta bon na comienso di nan estudio. ‘Nos ta dirigi palabra na e studiantenan y comparti cu nan con e experencia te na e momento aki ta. Tambe nos por mira cu e informacion cu nos ta bay ta dunando na Aruba ta yega e studiantenan. E grupo di e aña aki ta danki na esaki hopi mas bon prepara. Nos ta cuminsa piki e frutanan di nos biahenan pa Aruba, caminda nos ta bay pa informa nos hobennan adecuadamente y nos ta mira cu e grupo ta hopi mas bon prepara compara cu e grupo cu mi a encontra algun aña pasa,’ asina minister Besaril a bisa.

Sr. Besaril a bisa cu un aviso cu e ta duna e hobennan ta cu nan ta embahador di Aruba. Besaril: ‘Boso tur ta embahador di boso pais. Bo comportacion no solamente ta un reflexion di bo educacion na cas; e ta un reflexion tambe di con hende ta mira nos.’

Mescos den su encuentronan cu studiantenan na otro ciudadnan, minister Besaril a entafisa riba un balansa entre estudio y tempo liber. ‘No enfoca solamente riba bo estudio, pero tambe riba e aspecto di cultura, deporta of loke bo por haci den bo tempo liber na contribucion na comunidad. Asina bo ta haya un balansa den bo carera profesional, cu na e momento aki ta como studiante y e persona cu bo kier mira mayan. Esaki ta haci e plachi completo. Ami por bisa cu e experencia cu mi a pasa aden binti aña pasa, semper a keda cumi te e dia di awe. Esey ta conta tambe pa amistadnan cu mi a forma binti aña pasa ainda ta asina special. Esaki ta experencianan cu mi kier comparti cu boso pa asina boso tambe ta conciente cu algun dia boso por tin un posicion manera dimi of un dia boso ta na cabes di institutonan importante di nos pais’.

Tambe sr. Besaril a encurasha e studiantenan pa probecha cu nan ta na Europa pa biaha y siña conoce otro pais, otro hende y otro cultura. ‘Esaki por enrikese bo conocemento y contribui na bo formacion como un hoben adulto.’

Otro punto cu minister Besaril a enfatisa riba dje ta cu e studiante no mester cana rond cu pregunta of problema. Besaril: ‘Mas tempran bo acerca bo mentor, mas liher e por busca un solucion pa bo problema. Nos a conoce casonan di studiantenan cu na momento cu nan a acudi na Arubahuis pa ayudo, ya caba ta hopi laat. No laga esaki yega asina leu.’

Finalmente Minister Besaril a gradici e mentornan di Den Haag, Leiden y Delft Shahaira Brokke y Solange Quandus y nan POC pa e opvang na e studiantenan nobo y a desea e studiantenan tur clase di exito den nan estudio.

Banda di e discurso di minister Besaril e programa a consisti di presentacion di afdeling di Enseñansa di Arubahuis y di Taalweek di Haagse Hogeschool.


Leeuwarden

Den Haag  – Minister Plenipotenciario Guillfred Besaril a topa cu e grupo cu a bin pa studia na Leeuwarden. Tambe tabata presente coordinador di Enseñansa na Arubahuis James van der Linde, acompaña pa Rosalinda Croes-Kelly y Sharine Croes di Departamento di Enseñansa di Aruba (DEA).

Cu e bishita aki e mandatario kier a tende di cerca con ta bayendo cu e grupo di studiantenan cu a caba di yega y nan opvang. Akinan sr. Besaril a repeti su aviso na e studiantenan pa nan busca un balansa entre estudio y tempo liber. Tambe e mandatario a bisa e studiantenan cu nan tur ta embahador di Aruba. ‘Ora cu hende tende cu boso ta bin di Aruba, nan ta curioso pa sa mas di bo isla. Arubiano tin un bon nomber aki na Hulanda y esaki nos ta orguyoso dje.’

Minister Besaril a enfatisa den su palabranan na e studiantenan pa no keda cana rond cu pregunta of problema. ‘Ta pesey bo tin un mentor cu por scucha y por duna bo guia unda por. Tambe na e Universidad of scolnan tin personanan cu por yudabo. E estudio riba su mes ta exigi caba hopi di bo atencion, specialmente den e prome aña. Pesey menos preocupacion bon tin, mihor esaki ta pa bo resultadonan na scol,’ segun sr. Besaril.

Finalmente Minister Besaril a gradici e mentor di Groningen y Leeuwarden Donna van

Heukelem-Kock y su POC pa e opvang na e studiantenan nobo y a desea e studiantenan tur clase di exito den nan estudio.


Utrecht

Den Haag  – Minister Plenipotenciario Guillfred Besaril – den su afan pa encontra cu algun grupo di studiantenan pa a caba di yega Hulanda – a bishita e grupo cu a bin pa studia na Utrecht. Esaki a tuma lugar na comienso di nan programa di opvang na Centro di Conferencia Woudschoten. Tambe tabata presente coordinador di Enseñansa na Arubahuis James van der Linde, acompaña pa Rosalinda Croes-Kelly y Sharine Croes di Departamento di Enseñansa di Aruba (DEA).

E mandatario den su discurso na e studiantenan a entafisa riba encontra e balansa entre estudio y tempo liber. ‘Purba saca lo maximo di bo estadia na Hulanda. Estudio ta sumamenta importante, pero banda di esey bo mester hiba un bida social pa asina trece balansa den bo bida. Esaki ta hopi bon pa bo desaroyo mental,’ asina minister Besaril a bisa e studiantenan.

Sr. Besaril tabata hopi cla den su aviso pa e prome aña no bai Aruba cu vakantie. ‘E prome lunanan ta momentonan crucial pa bo estudio; bo enfoke mester ta riba esaki. Banda di esaki na e mesun momento bo mester cuminsa adapta na e bida na Hulanda.’

‘Disfruta di e opvang y purba na cera hopi amistadnan cu por ta hopi positivo den e prome aña. Hopi biaha esakinan ta amistadnan cu por ta duradero. Mi ta papia di mesun experencia dia cu ami a bin studia na Hulanda. Cu algun ainda e amistadad tei,’ tabata e comentario di minister Besaril.

E mandatario a bisa e studiantenan cu nan mester ta conciente di e hecho cu nan a caba un EPI, HAVO of VWO y esey ta nifica cu nan tin e potencial pa sigi un estudio avansa na Hulanda. Besaril: ‘Aruba a deposita confiansa den boso; saca probecho di esaki. Na otro banda tene cuenta cu boso lo encontra retonan riba boso caminda. No keda cana rond cu pregunta of problema, pero acerca bo mentor, miembronan di boso POC of Arubahuis. Bin padilanti cu bo problemanan pa bo por haya e ayudo nesesario y na tempo.’

Finalmente Minister Besaril a gradici e mentor di Utrecht Omar Besaril y su POC pa e opvang na e studiantenan nobo y a desea e studiantenan tur clase di exito den nan estudio.


Potret: cortesia di Cas di Aruba


Info / Contact

Pa mas informacion busca [A] Arubalening Portal den e alfabet menu of tuma contacto cu:

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw