Appel di Oro 2018

November 14, 2018

Departamento di Enseñansa ta presenta e di cuater edicion di e proyecto Appel di Oro | Premio Nacional di Excelencia den Enseñansa na Aruba.

Despues cu durante cuater aña consecutivo (2011-2014) a organisa e proyecto Maestro di Aña – un premio di reconocemento pa e Maestro di Scol, na aña 2015 a scoge pa amplia e proyecto pa duna reconocemento na mas actor cu ta importante pa enseñansa.

Consciente di e balor di e trabou den enseñansa y e reconocemento cu e merece, e proyecto a nace cu e meta pa duna atencion na e cosnan positivo cu ta sosode na scol y den klas, duna reconocemento pa e trabou den enseñansa y ilustra y stimula enseñansa di calidad.

Appel di Oro ta un premio cu ta rindi honor y reconocimento na tur esnan cu ta desplega excelencia den nan trabou diario den enseñansa.


Participacion


Participacion ta habri pa tur scol di enseñansa reglamenta na Aruba:

  • Enseñansa Primario
  • Enseñansa Secundario
  • Enseñansa Special
  • Enseñansa Superior 

Cu e Premio Nacional di Excelencia den Enseñansa lo duna reconocemento den e categorianan di:

  • Proyecto Escolar (Proyecto di Inovacion)
  • Maestro
  • Dirigente (Cabesante, Director, Rector of Unit Manager)
  • Lifetime Achievement (Maestro, Dirigente of Actor di Sosten pensiona)

Con pa aplica

Henter comunidad: alumno, studiante, mayor, coleganan maestro y/of dirigente di scol, ta bonbini pa nomina un persona of proyecto escolar pa Appel di Oro 2018.

Pa haci esaki mester yena e [Formulario di Nominacion] caminda ta describi en corto y mas concreto posibel pakico e persona of proyecto merece un Appel di Oro.

Hunto cu e formulario di nominacion mester entrega minimo un (1) Carta di Referencia.

E temporada di nominacion pa aña 2018 ta core te cu diaranson dia 12 di december 2018.

Ganador di Lifetime Achievement Award 2017 – Hetwig Kuiperdal

Director di Departamento di Enseñansa drs. Annemarie Proveyer-Groot ta invita tur esnan cu tabatin un experiencia excepcional cu un proyecto of un miembro di e personal di nan scol of den pasado como studiante na un of otro scol, pa nomina e proyecto of persona aki pa e premio Appel di Oro.

E proyecto Appel di Oro ta un oportunidad pa reconoce esnan cu ta destaca den enseñansa, esnan cu ta contribui na y representa excelencia den enseñansa, es decir, “Nos Heroenan di tur dia”.

Pa cualkier pregunta relaciona cu e proyecto Appel di Oro por tuma contacto cu sra. Sharine Croes na telefon 528-3415 of via email appeldioro@ea.aw.

 


Info | Contact

Pa mas informacion por busca den e alfabet menu riba homepage: [A] Appel di Oro of por tuma contacto cu: DEA.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw