Apertura Festival di Buki pa Mucha 2018

October 30, 2018

Dia 2 di november 2018 pa 6’or di atardi lo tuma luga e apertura di Biblioteca Nacional Aruba (BNA) su Festival di Buki pa Mucha, un proyecto organisa anualmente pa stimula lesamento cerca tur mucha den comunidad.


Participacion di Scol

Ideanan y inspiracion pa haci algo cu e tema ‘Amistad’ tin hopi y biblioteca ta duna tayer na maestronan di scol basico con pa traha cu e tema aki den buki, contamento di storia y otro expresion (manera wega y teatro). E tayernan ta den siman di 17 di september pero registracion ta necesario.

Den siman di dia 5 pa dia 9 di november un grupo di autor di buki pa mucha, ilustrador y contadornan di storia ta bishita mas o menos sesenta scol, primario, basico y special, riba nos isla. Nan ta bishita scol pa conta storia, papia tocante buki cu e mucha y pa stimula e mucha pa lesa.

BNA ta pidi e scolnan pa registra pa un bishita di un autor of ilustrador na scol. Tambe ta pidi docentenan pa registra pa e tayernan na biblioteca mas pronto cu ta posibel.


E Autornan

Autornan di buki pa mucha cu ta participa e aña aki ta:

Di Hulanda: Mariska Hammerstein, Jeroen Hoogerwerf, Evelien van Dort y Danielle Schothorst.
Di Corsou: Tio Ali, Crisen Schorea y Levi Silvania.
Di Boneiro: Denise de Jongh-Rekwest.
Di Surnam: Indra Hu-Ramdas.
Di Colombia: Pedro A. Vargas Alvarez.

E grupo di Aruba ta wordo forma dor di: Gino Vrolijk, Richard Dabian, Sergio Tjie-A-Loi, Rosabelle Illes, Liliana Braamskamp-Erasmus, Diana Marchena, Robert Reeberg y Vanessa Paulina como ilustrador.


Ilustracion pa e tema ‘Amistad’

Comision di e festival ta produci un buki pa mucha specialmente pa e festival. Un buki cu lo bay na e scolnan participante. E aña aki ta produci un compilacion di 15 storia. Cada storia a keda ilustra pa artista visual Vanessa Paulina. Vanessa a crea tambe e imahen di e festival cu ta expresa e tema ‘Amistad’.

Amistad entre mucha y adulto, entre hende y bestia, entre bisiña y un dushi ambiente di bario. Tambe Paulina a crea un serie di ilustracion colorido, bibo, vibrante di energia di amistad pa e buki regalo di Festival di Buiki pa Mucha 2018.

Vanessa Paulina a ilustra diferente buki pa mucha. E ta conoci tambe pa su cuadranan y murals.

Paulina a expone su obranan rond mundo y ta gusta duna workshops diferente.  El a produci 3 buki; ‘Tocht over de rivier’, ‘Puppie’s verhaal’  y ‘Wat word ik later?’ y a ilustra e buki ‘The search for Streya’.

Aki por lesa un entrevista cu Vanessa Paulina

 


Info / Contact

> Biblioteca Nacional Aruba (BNA)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw