Anochi Intercambio Informativo #StudiaNaHulanda sumamente exitoso

June 22, 2017

Recientemente Ministerio di Enseñansa conhuntamente cu Departamento di Enseñansa a presenta un anochi informativo caminda hopi studiante hunto cu nan mayor a ricibi diferente informacion di Arubalening, pero tambe a haya presentacion di e hoben di Corsou Eldrion Regina.

Durante e anochi organisa pa mas cu 100 studiante bayendo Hulanda pa estudio na nivel di HBO of WO, tanto e studiantenan como e mayornan a haci diferente pregunta riba puntonan cu pa nan tabata sumamente importante.

 

E meta di e anochi tabata pa yuda studiantenan cu nan transicion for di Aruba pa Hulanda door di duna mas informacion posibel. A combina e informacion entre esnan mas practico manera huisvesting, opvang y Arubalening, hunto cu otro informacion importante pe hobennan, pero tambe un anochi inspirativo pa hobennan cu ta comienso di un fase nobo den nan bida.

E parti practico tabata presenta door Departamento di Enseñansa encuanto Arubalening. Tambe tabata presente e directora di Arubahuis Shandra John, kende a duna informacion p’e procedura rond di yegada. Asina cu e studiantenan yega eynan, kico nan por spera y duna espacio na studiantenan y mayor pa haci pregunta.

Zahira Zandaam di Departamento di Enseñansa a duna un charla encuanto e aspecto di e “motivacion” pa scoge un area di estudio, y kico ta importante pa e studiantenan corda ora ta trata di tuma decisionnan. Tambe a presenta e resultado di un encuesta haci bou di studiantenan bayendo Hulanda.

Na final di anochi tabatin un presentacion sumamente impresionante di e hoben Eldrion Regina di Corsou. El a duna un mensahe cu tur hende lo corda riba dje: E diferencia cu “focus” por trece den nos bida. Eldrion Regina ta un persona cu ta splica diferente topico riba media social, tambe e la studia na Hulanda y por a trece e parti ey dilanti.

Studiante Angele Jansen a haya cu e anochi informativo a bay bon y nan a ricibi hopi informacion, aunke cu e mes tabata sa basta informacion.

Pa mi e tabata pa djis mi confirma sigur tur loke mi sa caba“, Angele Jansen a comenta.

Angele Jansen kende ta bayendo Hulanda, lo studia den e ciudad di Utrecht y lo studia pa “Logistiek en Economie” cu ta un estudio di 4 aña. Despues cu e termina esaki e lo kier haci su masters y bin bek Aruba y su desea pa tin su propio compania. 

 E studiante Luis da Silva a ricibi diferente informacion for di Departamento di Enseñansa y el a haya e anochi a bay bon. E anochi aki pa Luis da Silva ta un recordatorio di kico lo pasa na Hulanda.

Luis da Silva lo bay studia “Communication Multi Media Design” na Den Haag y e estudio lo dura 4 aña y despues 2 aña p’e Masters.

Katherin Lampe ta un di e studiantenan cu ta bayendo Rotterdam y lo studia den “International Business and Languages”, pero tambe e lo studia na banda mas idioma y e lo dura 4 aña pe bachelor, mientras pe estudio di idioma lo dura 2 pa 3 aña. Despues cu Katherin Lampe a dicidi cu e kier bay studia na Hulanda, el a cuminsa busca tur informacion corecto.

El a haya cu e anochi informativo hopi bon y a ricibi hopi informacion cu e tabata desea di haya sa.

Pa Nicole de Cuba e anochi informativo tabata uno hopi bon pasobra nan a ricibi hopi informacion. Nan a haya sa kico ta tur e stapnan cu nan tin cu tuma ora di yega Hulanda, prome cu bay, e seguro y con e bida ta na Hulanda. 

Nicole de Cuba ta sinti cu e no ta completamente cla ainda pasobra tin cosnan cu e mester caba di regla. Pero cu e informacionnan cu el a ricibi e ta sinti cu esey a yuda nan tur hopi.

Nicole de Cuba a termina su MBO den enfermeria y awo ta bay pa su HBO na Leiden.

E anochi informativo tabata hopi practico y hopi di loke nan a papia di dje como mayor cu ta interesa den nan yiunan mester a repasa e preguntanan varios biaha, asina e mayor Wendle Hasham a indica.

Wendle Hasham ta haya cu a pone e anochi informativo ta uno bon, pasobra tin mayor cu ta hopi ocupa y no a haya e chens pa dedica na esaki.

E di 2 yiu di Wendle Hasham ta bayendo Hulanda y e sa cu awo su yiu ta mas enfoca pa bay studia afo.

E yiu di Wendle Hasham ta bay studia “Marine Biology” y medio ambiente na Den Haag.

Minister Hooyboer-Winklaar a expresa cu e anochi informativo tabata un anochi exitoso y a sirbi como un plataforma pa tur studiante ricibi diferente informacion hopi necesario y Minister Hooyboer-Winklaar ta mira cu esaki ta un formula cu sigur mester sigui cun’e.

Mas informacion studiantenan tin, mas miho e escogencia ta y na final di dia e meta di tur hende ta exito pa tur studiante cu ta regresa cu un diploma. Esey ta e motibo tras di e anochi aki, pa prepara mas miho posibel pa asina yuda asisti nos studiantenan mas hopi posibel”, Minister Hooyboer-Winklaar a splica.

 

Pa mas informacion busca den e alfabet menu riba nos homepage:
S
Studia na Hulanda
Info/contact
Ministerio di Enseñansa

 

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw