Search Facebook Instagram Twitter

Acuerdo cu St. Mary’s College of Maryland

June 14, 2016

St. Mary’s College of Maryland ta un institucion di enseñansa superior na e estado di Maryland cu ta ofrece programanan acredita como “honors”. Minister di Enseñansa Michelle Hooyboer-Winklaar, despues di follow up riba combersacionnan di un bishita na Maryland cu a tuma luga na luna di mei, a logra cera un acuerdo cu e institucion aki.

Acuerdo ta inclui dos beca pa studiante

E dos becanan ta valido pa cuater aña y ta mara na cierto rekisitonan cu e studiante mester cumpli cu ne manera mantencion di un cierto nivel pa cu su cifranan. E dos becanan ta haci e institucion aki mas accesibel pa e studiante di Aruba, como cu e ta encera cu e studiantenan cu bin na remarke ta paga casi igual cu “in-state tuition” enbez di e prijs internacional cu un studiante di p’afo di e estado di Maryland lo mester paga.

Ainda 20 studiante di Aruba por aplica pa “Fall Semester”

E di dos beneficio cu ta disponibel na studiantenan di Aruba mesora, ta e oportunidad pa aplica ainda pa cuminsa college den e siguiente periodo. E oportunidad aki ta reserva pa un total di 20 studiante di Aruba.

E titular di enseñansa a splica cu e acuerdo ta marca un momento alegre pa mundo di enseñansa na Aruba, como cu pa medio di esaki e studiantenan di Aruba tin un opcion mas pa studia na un universidad prestigioso y di nivel halto cu cual Aruba tin un relacion special. E acuerdo ta e di seis combenio cu Ministerio di Enseñansa ta firma cu un institucion di enseñansa superior den exterior.

E proceso a cuminsa na luna di mei durante di e mandatario su bishita unda cu el a topa cu representantenan y ehecutivonan di e scol. Accesibilidad pa studiantenan di Aruba na un institucion di enseñansa superior ta keda un reto y Minister Hooyboer-Winklaar a priminti di sigui boga pa y busca mas scolnan di enseñansa superior acredita y di bon reputacion na Merca y Canada cu ta ofrece nos studiantenan beneficionan manera e descuento riba nan “tuition fee”.

Saint Mary’s Honors College ta ofrece preparacion pa hopi carera interesante, y e minister ta pidi studiantenan pa explora e oportunidadnan cu ta wordo ofreci. E oportunidad cu St. Mary’s Honors College ta ofreciendo studiantenan pa inscribi ainda ta uno fantastico. Minister Hooyboer-Winklaar ta encurasha tur studiante cu no a logra pa un motibo of otro di aplica na un scol di enseñansa superior na tempo, pa probecha di e chens aki.

E meta principal di tur e esfuersonan aki ta pa kita obstaculonan y crea mas oportunidadnan pa hobennan di Aruba studia na un institucion di enseñansa superior, pa eleva e experiencia di e studiante, y pa Aruba tin mas studiante cu ta gradua for di un institucion di enseñansa superior.

 


Info / Contact

Pa mas informacion por busca den e alfabet menu riba homepage:  [S] Studia na Merca  of por tuma contacto cu DEA > afdeling Studiefaciliteiten.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets