Accenda: Innovacion y Enseñansa mester bay man den man

May 2, 2018

Den Haag  – Minister Plenipotenciario Guillfred Besaril a wordo invita pa e ehecutivonan di Accenda pa bishita nan establecimento na e High Tech Center na Delft.

Potretnan cortesia di Arubahuis

Martin y John Seiffers di Accenda a ricibi e mandatario durante su bishita di trabao na dicho compania. Minister Besaril y e delegacion di Arubahuis – cu a consisti di Representante di Aruba na Union Europeo Eddy Paris, Director Interino di Arubahuis mr. Glenn Ling, coordinador di Onderwijszaken di Arubahuis James van der Linde y funcionario di Economische Acquisitie di Arubahuis Roy Hart- a haya un guia na e werkplaats di Accenda, unda Martin Seiffers a duna un splicacion di e proyectonan di Accenda.

Despues den su oficina sr. Seiffers a tene un presentacion pa e delegacion di Arubahuis riba Accenda,  nan vision y nan proyectonan.


Innovacion y Enseñansa

Accenda ta specialisa den comberti autonan regular den autonan electronico. Den esaki nan ta traha intensivo cu alumnonan di diferente nivel di scol: MBO, HBO y WO.

Durante di e presentacion Martin Seiffers a accentua cu innovacion y enseñansa ta bay man den man. P’esey ta importante pa envolve scolnan den proyectonan cu ta regarda innovacion. Den e caso di Aruba, lo mester mira den direccion di EPI y Universidad di Aruba.

Na final di e presentacion Seiffers a papia riba nan contactonan y plannan cu nan tin pa ehecuta na Aruba y cu speransa pa esaki wordo concretisa pronto.

Minister Besaril a apoya e manera di pensa aki y a bisa cu tambe ta importante pa concretisa proyectonan manera esunnan di Accenda, mester papia cu tur partnernan envolvi desde un principio y asina e proyecto por cana den bon direccion.

Finalmente Minister Plenipotenciario Guillfred Besaril a gradici Martin y John Seiffers pa nan atencion, pa e informacion brinda y pa nan pasion pa logra proyectonan innovativo na Aruba.


Info / Contact

Pa mas informacion por tuma contacto cu: [Kabinet van de Gevolmachtigde Minister van Aruba – Arubahuis]

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw