Buscando un topico?
Mustra tur topico

Commissie Naschoolse Opvang Voortgezet Onderwijs
Diabierna 07 di Februari di 2014 00:00

Gabinete Mike Eman II ta consciente cu un pais desaroya mester percura no solamente pa un bon educacion pa mucha y hoben, pero tambe un bon formacion general di nan como ciudadano.

Basa riba esey y riba e necesidad cu tin pa hobennan di Scol Secundario tin un luga pa bay cu actividad y guia despues di scol, Gobierno di Aruba a forma un Grupo di Trabou yama Commissie Naschoolse Opvang Voortgezet Onderwijs.

Video: Gabinete Mike Eman II lo implementa Naschoolse Opvang


E grupo aki tin e tarea specifico di hinca den otro un sistema caminda hobennan di scolnan secundario tin un caminda pa haya guia di huiswerk, bijles y actividad extra curicular manera deporte, arte, etc. E idea ta pa despues di oranan normal di scol, hobennan di MAVO y otro scolnan secundario por tin un luga pa pasa atardi caminda nan ta haya guia necesario cu nan les, pero tambe por participa den actividadnan riba tereno di arte, deporte, cultura y formacion civico.

Prome Minister Mike Eman y Minister di Enseñansa Michelle Hooyboer-Winklaar ta trahando hunto riba e proyecto aki.

Premier Eman a tuma nota den su multiple contacto cu pueblo cu hopi biaha e ambiente cu hobennan ta yega na dje na cas despues di scol ta uno sin supervision, sin guia y sin oportunidad pa haci algo productivo. P’esey a tuma e iniciativa pa yama esnan tras di e proyecto exitoso di Traimerdia, ademas di otro instancianan manera Departamento di Enseñansa Aruba (DEA), pa traha hunto riba un programa similar, pero destina na hobennan di scolnan secundario.

Diabierna dia 7 di februari ultimo a institui pa medio di un Decreto Ministerial e Grupo di Trabou Naschoolse Opvang Voortgezet Onderwijs.

E comision aki ta consisti di sra. Natasha Anthony di Minsterio di Enseñansa, sra. Josette Daal di SKOA, sr. drs. Jose Fernandes Perna di IPA, sra. drs. Monique van Helvoort di Stichting EPB, sra. drs. Gracia Garcia-Dijkhoff y sra. Anna Maria Proveyer-Groot, director di Departamento di Enseñansa Aruba cu sr. drs. Bart Kool di Ministerio di Asuntonan General como presidente cu asistencia di sr. Piet Pronk, ex-director di Colegio Arubano y fundador di Universidad di Aruba.

E comision tin un tarea specifico y cu fechanan mara na dje tambe. Ya caba pa dia 21 di maart proximo nan mester presenta propuestanan concreto. E bala ta bay sigui lora pa ya caba na luna di augustus proximo, cu ta inicio di aña escolar 2014-2015, implementa e programa na por lo menos cinco di e diescinco scolnan secundario riba nos isla. Esaki ta bira e proyecto piloto y di eynan lo sigui expande.

Prome Minister Eman a aclaria cu e programa no ta bay wordo ehecuta dor di docentenan di e propio scolnan, kiermen no ta bay pidi maestronan pa traha mas oranan. E grupo di trabou mester haci uzo di recurso humano existente y capacita for di departamentonan den e aparato publico. Na Merca un programa cu meta similar ta conoci como 'Beyond the Bell'. Prome Minister ta reconoce cu lo mester capacita e profesionalnan aki den tereno di pedagogia, pero asina ta busca pa haci un distincion cu e programa no ta un extension di les, pero un oportunidad pa hobennan por desaroya y eherce nan talento den otro areanan. Guia den trahamento di huiswerk ta forma un parti esencial, entre e funcionnan di e programa, pero mescos lo ofrece formacion civico of maatschappelijk vorming na e hobennan.

Premier Eman ta hopi entusiasma cu e proyecto y ta ansioso pa mira e trabou cu e grupo di profesional y experto lo haci pa asina na augustus ranca sali cu e prome gruponan. E mandatario tin pleno confianza cu e oportunidad aki lo ta beneficioso tanto pa e hobennan cu lo por desaroya nan mes por completo, pero tambe pa e mayornan y pa pueblo en general, pasobra ta dunando un aporte importante na crea e ciudadanonan di futuro.

 

Info/Contact

Ministerio di Enseñansa